Suzette Botes is betrokke by ’n argiteksfirma en sy vertel meer oor die slaggate waarmee mense te doen kry: vanaf die koop van ’n erf of huis, die bou van of aanbou aan ’n woning (residensieel) of selfs die aankoop van landbougrond en kommersiële of industriële geboue of grond. Stuur jou vrae aan This e-mail address is being protected from spambots. You need JavaScript enabled to view it .

Daar is vyf soorte sonerings wat op erwe, waar wonings gebou gaan word, van toepassing is. Ek begin deur drie te bespreek:

Residensieel 1
Een woning (dubbel- of enkelverdieping) met buitegeboue. Dié erwe se groottes begin gewoonlik by ’n minimum van 500 m². Die vloeroppervlak-verhoudingbeperking word per ontwikkelingsgebied bepaal en dit is onmoontlik om hier wesenlik daarna te verwys. Raadpleeg die ‘Tshwane Town Planning Scheme’, 2008 (Revised 2014).

Residensieel 2
Dié sonering is gemik op hoër digtheid ontwikkelings, met ’n maksimum digtheid van 25 eenhede per hektaar, ’n maksimum erfgrootte van 400 m² per erf. Die erwe is kleiner. Net een huis per erf word toegelaat (dubbel- of enkelverdieping, losstaande of semi): 40% dekking en geen vloeroppervlak-verhoudingbeperking is van toepassing nie.

Residensieel 3
Enkel- tot dubbelverdieping wonings is kleiner as by Res 2, en ’n dupleks en semi word hier toegelaat. Maksimum drie verdiepings. Vir elke eenheid in die woongebied moet 4 m² eenkant gesit word vir ’n park (speelplek) met ’n minimum park van 50 m². Maksimum dekking is 40%. Die vloeroppervlak-verhouding is 0.4.

Dokumente
Ek wil graag beklemtoon dat wanneer daar na ’n eiendom gekyk word, veral ’n oop stuk grond, die voornemende koper die eiendom se soneringsertifikaat moet aanvra, asook sy Landbou Generaal Diagram (LG Diagram) en ’n kopie van die eienaar se titelakte.

Dié dokumentasie is openbare inligting en die POPI-wet is nie hier van toepassing vir die beskerming van persoonlike inligting nie. Die dokumente bevat waardevolle inligting oor die eiendom en sal belangrike aspekte, soos grondgebruik, sy boulyne en servitute aandui.

Ons het al ’n kliënt gehad wat, nadat hy ’n stuk grond gekoop het, agtergekom het dat ’n servituut reg deur die middel van die eiendom geregistreer was. Dit het beteken dat daar feitlik geen grond oorgebly het om op te bou nie.

Suzette Botes

Diagram
Die LG Diagram bepaal die bakens van die grond. Die agent behoort die bakens aan die koper uit te wys volgens die diagram. Indien daar nie bakens bestaan nie, het die koper die reg om aan te dring op ’n landmeter wat die bakens sal vasstel. Die titelakte bevestig die huidige eienaar, asook enige stipulasies soos servitute en grondregte.

Baie min eiendomsagente doen die moeite om vir kopers dié inligting te kry. Ek voel dat dit ’n vereiste moet wees. Ons stadsbeplanner het ook aanbeveel dat enige voornemende kopers van grond, veral leë erwe, moet bepaal wat die huidige sonerings is en ’n lewensvatbaarheidstudie deur ’n stadsbeplanner moet laat doen om te verseker dat die koper se ontwikkelingsdoel binne die wetlike raamwerke van die plaaslike owerheid werkbaar is.

Dit gebeur dikwels dat ’n koper ’n stuk grond bekom met die doel om dit te ontwikkel, net om uit te vind dat die grond geensins vir die ontwikkeling wat hy/sy in gedagte gehad het, gebruik kan word nie. Hersonering kan in baie gevalle gedoen word.

Registreer
Die koper is ook verplig om, sodra die eiendom op sy naam geregistreer is, die eiendom by die betrokke owerheid, soos Stad Tshwane, te registreer sodat erfbelasting betyds betaal kan word. Van ons kliënte het ’n erf gekoop met die doel om later te bou en toe hulle planne laat optrek, moes ons uitvind dat hulle eiendom nie by die munisipaliteit in hulle naam geregistreer is nie en dat hulle maande en soms jare met erfbelasting agterstallig is. Die munisipaliteit sal nie planne vir goedkeuring inneem voor die rekenings op datum is nie.