Dr Hannelie Human van Bronkhorstspruit skryf:

Ek wil u gelukwens met u oulike artikel oor die skilpadkewers in die Januarie-uitgawe. Dit wys dat daar deeglik opgelees is oor hierdie insekte en ek kan eintlik nie veel meer daartoe byvoeg nie.

Die skilpadkewers waarvan u berig mag moontlik die aartappel- skilpadkewer, Solanophilla dregei, wees. Hulle is ’n bekende gesig in die Pretoria omgewing, onder andere by die ou Fort by Wonderboom en pla ook die inwoners by die Kungwini-dam gebied en word in verskeie provinsies gevind. Soos u reeds weet is skilpadkewers meestal nuttige insekte omdat hulle as larwes en volwassenes voed op ander skadelike insekte, soos plantluise, wolluise en cochenille.

Ongelukkig is die aartappel-skilpadkewers blaarvreters en word hulle beskou as ’n plaagspesies. Gewasse wat deur hulle aangeval word sluit in aartappels, pampoengewasse, rape, radyse, boontjies en spinasie.

Die volwasse insekte spandeer die grootste deel van hul lewe as ’n massa onaktiewe kewers op heuwels. Na die eerste goeie reëns, meestal in Oktober, vlieg die volwasse kewers na beskikbare aartappellande of ander voedselbronne waar hulle voed op die bokant van blare.

Die wyfies lê dan ongeveer 30 eiers per groepie aan die onderkant van die blare en kan onder gunstige toestande tussen 600 tot 800 eiers lê wat binne agt dae uitbroei, verander in papies en dan vyf tot ses dae later as volwasse kewers te voorskyn kom.

Teen die einde van die jaar begin die volwassenes migreer (tot so ver as 20 km) na die hoogste noordelike heuwel of berg waar hulle in massas saamkoek en begin met hul ‘winterslaap’. Ek is ’n insek fisioloog en dus nie ’n insek plaagspesialis nie, maar indien u verdere inligting benodig, kontak asseblief vir Dr At Schoeman by die Departement Dierkunde en Entomologie aan die Universiteit van Pretoria by 012-420-3233. Hy is ’n kenner op die gebied van insekplae.

Baie dankie vir die terugvoer en kontaknommer.-Red