Elize Greyling het vir die Bronnie ‘n foto van ‘n vreemdsoortige ‘wurm’ gestuur. Sy het gesê dat dié snaakse kreatuur in die tuin in Garsfontein gevind is. Hy was 75 mm lank en 70 mm dik. “Enige idee wat dit is,” het Elize gevra.

Die Bronnie het by Petro Lemmer, omgewingskundige van Pienaarspoort, vir raad gaan aanklop. Petro sê dat dié larwe van dieselfde familie as die mopaniewurms is en aan die gewone pou-oog mot (‘Common Emperor’) behoort. Dit is ‘n baie groot, lomp mot wat na lig aangetrek word waar roofdiere hulle maklik vang. Hulle vlerkspan is 160 mm.

Dié ‘wurm’ wat Elize Greyling in Garsfontein afgeneem het

Larwes leef op onder meer kiepersol (Cussonia sp), Bauhinia (Pride of De Kaap), Croton (laventel-koorsbessie) en Harpephyllum (wildepruim) bome.

“O ja,” sê Petro, “net soos die mopaniewurm en die bleek pou-oog, wat op wilde seringe voed, is hierdie larwes ook eetbaar. Ek dink ’n mens moet hulle waarskynlik kop-eerste insluk – daardie stekels is hard en skerp!”

Elize se ‘wurm’ is die larwe van ‘n gewone pou-oog mot
Foto: YouTube greep

Petro sê dat hier ook ‘n ander soort pou-oog mot voorkom wat op die Acacias voed. Die spookmot (‘Ghost Emperor’), Heniocha dyops, is ‘n groterige spierwit mot met duidelike grys-swart merke. Sy larwes is die mooiste van alle pou-oog larwes: Smarag groen met blink silwer stekels, ‘n smal pers streep op die sy en oranje spirakels.