Moenie dink dat dit net die
migrerende koekoeke is wat
hul eiers in ander voëls se
nessies lê nie. Die koningrooibekkie
doen dit ook, maar sy kuikens vernietig
ten minste nie die pleegouer
se eiers of kuikens nie.
Koningrooibekkies parasiteer hoofsaaklik
op sysies, asook klopkloppies,
frette en langstertjies. Twee
tot vier eiers word in die pleegouer
se nessie gelê en as die indringerkuikens
uitbroei, aap hulle ewe
netjies die ander kuikens in die nes
na.
Die koningrooibekkie is ongeveer
12 cm lank en in die broeiseisoen
het die mannetjie ’n reuse stert van
22 cm. Dié stert is ’n ding wat behoorlik
vertoon word. Die vertonende
mannetjie volg ’n ingewikkelde
ritueel waar hy in die lug bo die
wyfie fladder en sy stert op en af
ruk terwyl hy aanhoudend ‘tseeettseet-
tseet’ roep om aandag op
homself te vestig.
![](/images/stories/mar2010/onso3.jpg)
Koningrooibekkie
Foto: Wikipedia
So ’n broeiende mannetjie is onmiskenbaar;
hy is swart aan die bokant
met ’n wit agternek en onderste
dele, ’n rooi snawel en verlengde
stertvere. Hy verskil van die pylstertrooibekkie-mannetjie deur die afwesigheid
van spatelvormige punte
aan sy spog-stert en deurdat hy
onder wit en nie dofgeel is nie.
As die broeiseisoen verby is, begin
hy nes sy wyfie lyk: bo-op dofgeel,
onder ligkleurig en met ’n duidelik
gestreepte swart-en-dofgeel kop. Jy
kan die mannetjie en wyfie egter
onderskei deur na die snawel te kyk;
die mannetjie se snawel is rooi en
die wyfie s’n is bruin.
Onvolwassenes is ’n effekleurige
bruin.
Koningrooibekkies is aggressiewe
voëls wat ander spesies wegjaag by
voerplekke. Hulle vreet hoofsaaklike
sade, maar sal ook insekte vreet, en
bly in grasveld, savanne, struikgewasse,
tuine en parke. |