Die kierieklapper kry sy
naam omdat sy jong takke
amper perfek reguit groei
en tradisioneel die ideale sterk kieries gemaak het.
Die hout van dié kleinerige boom is
so sterk dat dit gebruik word as
stutte in myne en as handvatsels vir
pikke en byle. Goeie kwaliteit meubels,
veral stoele en koffietafels,
word van dié boom gemaak. Sy
hout is ideaal vir heiningpale omdat
dit termiet en insek-bestand is en sy
stompe maak ’n goeie braaivleisvuur
omdat die kole so lank hou.
Jy kan tee, wat blykbaar net soos
gewone tee proe en lyk, van die
kierieklapper se vrugte maak. Die
vrugte moet egter nie te lank
gekook word nie, anders word dit
bitter.
Die kierieklapper, Combretum
hereroense, kan tot tien meter hoog
word. Sy blare word gevreet deur
vee en ’n verskeidenheid wildsoorte
soos olifante, kameelperde, koedoes,
njalas, rooibokke en steenbokke.
![](/images/stories/jan2010/onso1.jpg) Kierieklapper
Foto: Making the most of indigenous trees
Sy blomme lok baie vlinders en
perdebye, met ’n verskeidenheid
insekvretende voëls op hul hakke.
Die boom blom van September tot
November. Romerige tot geel blommetjies
met ’n soet reuk verskyn
voor die boom blare kry.
Die rooibruin vrugte, wat waarskynlik
verantwoordelik is vir die ‘klapper’
deel van die boom se naam, het
vier prominente vlerke soos alle
bome in die Combretum-familie. Die
vrugte word van Januarie tot Junie
gedra. Hulle is baie duidelik sigbaar
en laat dit lyk asof die boom ’n
koperkleurige kroon dra.
Die kierieklapper het nie ’n aggressiewe
wortelstelsel nie, is droogte- en
tot ’n seker mate rypbestand. Die
boom groei goed in dekoratiewe
potte en met ’n
bietjie snoeiwerk, kan hy ’n
netjiese vorm aanneem. Hy
is een van die beste boomspesies
om ’n bonsai van te
maak omdat die bonsai na
slegs drie jaar soos ’n volwasse
boom begin lyk.
![](/images/stories/jan2010/onso2.jpg) Die vrugte het vier prominente vlerke
Jy kan dié boom van saad
af groei. Gebruik vars sade,
omdat dié op die grond
waarskynlik besmet is met
insekte. Verwyder die saad van sy
gevleuelde omhulsel en week oornag
in water.
Saai die saad in saailingbakke in ’n
5:1 mengsel van riviersand en kompos.
Die saad sal binne ’n week of
twee ontkiem. Plant die plantjies
oor in swart sakke as die saailing die
drie-blaar stadium bereik.
Die boompies sal vir die eerste drie
tot vier jaar baie vinnig groei, maar
groei daarna stadiger om ’n hoogte
van vier meter in 12 jaar te bereik. |