Hadedas is die voëls in ons
gebied wat die swaarste kry
in droë seisoene. As die
grond te hard is, kan hulle nie hul
snawels daarin druk om die erdwurms,
wat een van hul hoofvoedselbronne
is, in die hande te kry
nie.
Dit is hoekom hadedas floreer op
voorstedelike grasperke en sportvelde
wat dwarsdeur die jaar natgehou
word. Hulle is gewoonlik
welkom in tuine omdat hulle ook
slakke, insekte, spinnekoppe en
klein reptiele vreet.
Lawaai
Mense wat ongelukkig genoeg is
om ’n boom voor die kamervenster
te hê waar ’n swerm hadedas
oornag, sal egter nie saamstem
met dié verwelkoming nie.
Hadedas slaap in swerms van tot ’n 100 voëls wat skielik in die middel
van die nag soos wekkers kan
afgaan met hul kenmerkende klipharde
ha-haaa-ha geluid. Hoewel
hulle in groot swerms slaap, beweeg
hulle bedags ver van hul
slaapplek af in kleiner groepies van
tien tot 30 voëls.
Hul roep mekaar terwyl hulle van
dié slaapplek af vlieg in die oggend
of terugkom in die aand. Hadedas
is geneig om elke dag dieselfde
roete te volg en is so stiptelik dat ’n mens jou horlosie kan stel op
hul terugkeer slaapplek toe.
Dié swerms gebruik jaar na jaar
dieselfde boom as slaapplek, maar
broei in pare, weg van die swerm
af. Hulle broei in Augustus, September
en Oktober. Die nes is ’n
platform van stokke met gras boop.
Dit is gewoonlik in die takke
van ’n boom wat oor water of ’n
kloof hang. Neste is egter ook al
op telefoonpale gesien.
![](/../images/stories/nov2008/novonsO1.jpg)
Hadeda
Foto: Dawid Loubser
Hofmakery
Hadedas het ’n vreemde hofmakery.
Eers sal twee voëls van die
res af wegbreek en daagliks saam
loop en kos soek. Hulle maak
mekaar se vere skoon, vleg hul
nekke ineen en voer ’n ongewone
groetproses uit waarin die voëls
mekaar aan die snawel gryp, die
snawels dan heen en weer ratel
terwyl hul koppe saam op en af en
kante toe beweeg. Hul sal soms
terselfdertyd hul snawels klap en
hul kop en nekvere laat rys.
Hadedas lê drie of vier ligte olyfgroen
eiers met rooierige merke
op. Die eiers vat 25 tot 28 dae om
uit te broei. Die kuikens kan so
lank as twee dae vat om hul pad
deur die eier oop te pik. Hul bly vir
ongeveer 33 dae in die nes en is
agterna nog afhanklik van hul
ouers.
Die hadeda, Bostrychia hagedash,
is 76 cm lank. Hy is ’n vaal,
gryserige bruin voël wat glansende
brons vlerkdekvere toon in
die son. Sy gesig is grys met ’n
wit streep wat van die snawelbasis
tot onder en agter die oog
loop. Die donker, lang, afgeboë
snawel het ’n rooi rif op die
bo-mandibel.
Die geslagte lyk eners en die
onvolwassenes het nie die rooi op
die snawel of die brons op die
vlerke nie. |