Welkom by die derde uitgawe van die Bronnie wat elektronies uitgegee word. Ons is oneindig dankbaar om te kan berig dat die vorige uitgawes, waar ons gedwing is om planne in uitsonderlike omstandighede te maak en om die aanlyn-pad te loop, met bykans oorweldigende geesdrif ontvang is en baie wyd en deeglik gelees is.
Die positiewe terugvoer (soos in enkele skrywes hiernaas weerspieël word) van getroue Bronnie-lesers uit ons gebied en ook van sommige van die letterlik duisende nuwe lesers uit ons kontrei en ook van dwars oor die land en die buiteland, verwarm die hart en maak ons opgewonde oor die toekoms: ‘n Toekoms van groei waar ons beplan om die gedrukte Bronnie weer op sy verspreidingspunte beskikbaar te stel, maar daarmee saam ook om vol te hou met die baie gewilde aanlyn-uitgawe.
Saam met die verwagte (eintlik gewaarborgde) drastiese vermeerdering in lesers-getalle, sal dié nuwe era ook uiteraard aansienlike groter en volgehoue blootstelling aan ons gewaardeerde adverteerders tot gevolg hê.
Die voorneme was om reeds met dié Junie-uitgawe ook weer die glanspapier-tydskrif te versprei, maar onvoorsiene omstandighede, soos dié waaraan ‘n mens deesdae in dié onvoorspelbare tye al bykans gewoond geraak het, het op die laaste nippertjie ‘n stokkie daarvoor gesteek. Ons hoop en vertrou om met die Julie-uitgawe dié opwindende nuwe pad volstoom te begin loop.
Intussen kan ons nie nalaat om ons adverteerders, waarvan sommige ook weens die omstandighede swaar trek en baie ook nuwe en innoverende planne moes maak om sake aan die beweeg te hou, uit ons harte te bedank vir die volgehoue ondersteuning oor die afgelope 18 jaar nie.
Ons is ook opreg dankbaar vir die Bronnie se lojale lesers, wat ook nou, soos oor al die jare heen, deur wonderlike meelewing en die volhardende ondersteuning van ons adverteerders, die Bronnie-hart vol hoop vir ‘n blink toekoms aan die klop hou.
|
