Nyamazan die Burchell-sebra en Rocky die bulhond verwyl die inperkingstyd in die Oechlers se kombuis op hulle Elandshoek-plaas buite Rayton.
In 2003 het ons die verhaal van Lila Oechler en Nyamazan, wat toe vier jaar oud was, vertel. Lila het Nyamazan, wat die Zulu-woord vir ‘klein diertjie’ is, as ‘n sewe-maande oue vul by ‘n wildsplaas net buite Pretoria gekoop.
In Oktober 2017 het ons vertel dat Nyamazan deel is van Lila se Dinokeng sebra-toere op Elandshoek.
![](/images/stories/mei2020/die1.jpg)
Nyamazan en Rocky is inperkingsvriende
Foto: Heinrich Oechler Ribot
Op dié plaas woon daar nog twee sebras: ’n jong merrie, Nandi, wat Lila geleer het om gery te word; en Xena wat ongelukkig nie vir die toere gebruik kan word nie al is sy baie mak. Lila vertel dat mense Xena hans grootgemaak het en dat sy partykeer onvoorspelbaar kan wees.
Nyamazan is vriende met Lila se kwartmylperd (“quarter horse”) Flash en ook met Nandi. “Ongelukkig kan ek hom nie by Xena sit nie, want sy val hom aan en jaag hom tot hy gedaan is,” sê Lila.
Nyamazan is nou 21 jaar oud. Sebras wat mak aangehou word kan soos ’n perd 25 jaar of ouer word, maar in die natuur lewe hulle gemiddeld net so 10 tot 12 jaar voor hulle as prooi gevang word. |