Vreethans van Heerden en Metgesel besoek kuierplekke in die Bronberg-gebied ongenooid en betaal self vir dit wat hulle geniet, of dalk nie geniet nie

Met ’n vorige besoek aan Egons moes ons hoor dat die kok by ’n begrafnis is, ‘jammer’. Dié keer was die kok op sy pos. En die kok is niemand anders as Egon self nie, vind ons toe uit. Sy vrou, Petra, is die kroegingenieur. Om by Egon en Petra se plek, langs die pad tussen Rayton en die N4 te kuier, is soos om in vriende se voorkamer te kuier, merk Metgesel op. Dis onpretensieus en gemaklik.

Wat ?n mens sien as jy in Egons se deur staan

Ons sit aan by een van die ou eetkamertafels en geniet eers ’n ietsie te drinke terwyl ons die spyskaart bekyk. Nie ’n verskriklike wye keuse nie en duidelik met ’n sterk Duitse inslag, oorheers varkgeregte die spyskaart.

Hulle is veral bekend vir hulle Eisbein, sê Egon. Later bring hy een nader vir ons om te bekyk en dis ’n bielie. Die Eisbein kos R90. Ander geregte met ’n sterk kontinentale oorsprong is Wiener Schnitzel teen R70, Theringer Bratwurst, R52, gekrummelde varktjops, R67 en varkribbetjie teen R64.

Die aansitplek is mooi ou eetkamertafels

Jy kan ook gekrummelde stokvis teen R50 bestel, wat toe presies is wat ek doen. Metgesel bestel gekrummelde hoenderrepies teen R44. Sy sê jy kan vir haar bykans enigiets gee as dit ’n lekker krummel om het. Sy sê sy is kommin op daai manier.

Nog op die spyskaart is ‘Rump steak’ teen R44 en Thai sop met noedels teen R25, wat nogal vreemd is op ’n Duitse spyskaart.

?n Groot stuk stokvis, perfek gekrummel

Te laat sien ek op die swartbord teen die muur dat daar ook beespotjie beskikbaar is teen net R35. My vis kom aan en dis nie ’n vissermanstorie as ek jou vertel dat dit ’n groooot vis is nie. Ek het saam met die vis brat kartuffelen bestel en ek vind dit voortreflik. Die krummel om die stokvis is perfek vir my en die vis is net reg gaargedoen. Ek geniet. Metgesel geniet ook haar krummelhoendertjie en braai-aartappels.

Eendag as ek baie honger is, sal ek weer by Egons inval en ’n Eisbein eet.