Twee agtjarige meisietjies het op eie inisiatief ’n konsert gereël om geld in te samel vir die Paul Jungnickelhuis vir gestremdes. Die twee kleintjies met die groot welsynharte se pogings is aanvanklik nie ernstig deur hulle ouers opgeneem nie, maar hulle was vasbeslote om ’n verskil te maak.

Amber Williamson en Cara van der Walt het op 25 Julie ’n musiek en dansvertoning by Amber se ouerhuis in Mooikloof gehou en R667.30 ingesamel.“Aanvanklik het ons gedink dit is net nog ’n speletjie,” sê Amber se pa Eddie Williamson. “Maar toe begin dié twee kinders mense nooi en kaartjies verkoop en eetgoed vir die konsert reël.” Eddie sê dat die kinders nou hulle boeties en sussies en maatjies betrek en hulle beplan om weer so ’n fondsinsamelingskonsert te hou.

Dit was vir hulle ’n groot ervaring om die mense van die Paul Jungnickelhuis te ontmoet, sê Eddie.

Die agtjarige Amber Williamson, links, en Cara van der Walt, regs, oorhandig die geld wat hul ingesamel het aan Daleen Botes van die Paul Jungnickelhuis