Het jy geweet dat gratis praatjies oor kleinsake ondernemings weekliks by Bronberg Wynlandgoed gehou word? Jaco Erasmus is die aanbieder en hy sê daar het die afgelope paar maande heelwat interessante brokkies inligting uit die gehoor gekom. Hier volg ’n opsomming van praatjie-temas, sowel as van die gehoor se opmerkings.

Personeel
Daar is vele mynvelde hier, soos die indiensnemingskontrak se bewoording, ’n dissiplinêre kode en grieweprosedure, sowel as wat verwag kan word by die CCMA. Aanbieder Jaco Erasmus het vertel hoe hy self in ’n CCMA verhoor net op sy dokumentasie kon staatmaak vir ’n billike verhoor. Geen mondelingse getuienis is aanvanklik aangehoor nie. Verder het ons die opsies rondom salarisrol sagteware bespreek en wat elkeen se voordele en kostes is.

Gratis weeklikse praatjies

Ouditvoorbereiding
Skarrel jy voor ’n oudit om alles betyds reg te kry? Moet jy ure afstaan aan ouditpersoneel met die oudit? Jaco het die gehoor deur die soorte oudits begelei en ook die nuwe Maatskappywet se moontlike implikasies vir oudits bespreek. Uit die gehoor is daar verneem hoe mense sukkel om te verstaan wat altyd met ’n oudit verlang word asook hoe vinnig kostes kan styg as jy onvoorbereid is. 1StopFin se “straatwyse ouditlêer” is bekend gestel, wat sake vir entrepreneurs in die toekoms behoort te vergemaklik.

Kontantvloeibeplanning
Dié is altyd ’n interessante sessie. Daar is grafies aan die gehoor gewys hoe jy ’n groot verbetering aan jou kontantvloei kan maak sonder om omset te verhoog of pryse te lig – net deur jou debiteure, voorraad en krediteure beter te bestuur (kontant- omsettingsiklus). Een kliënt het tydens ’n opvolg-afspraak agtergekom dat, ten spyte van die feit dat hy sy besigheid kontant bedryf, hy ’n hele paar duisend Rand in uitstaande debiteure het.

Opsomming
Met die laaste sessie in die reeks is die vorige temas opgesom en is ’n bietjie dieper gedelf. Wat is die verskil tussen wins en kontantvloei? Wat nou gemaak as jy wins op papier toon maar nie geld in die bank het nie? Die gehoor kon hiermee identifiseer en heelwat is gepraat oor waarom ons nou eintlik ’n besigheid het.

Vanaf Januarie 2011 word dieselfde reeks aangebied, sowel as ’n nuwe reeks in Februarie. Kontak
1 StopFin om plek te bespreek. Besonderhede is op hul advertensie. Die besprekingsgroep is doelbewus klein, sodat almal genoeg tyd het om vrae te vra en antwoorde te kry.