Dit wil lyk of daar ná baie jare se skaamtelose korrupsie, wanbestuur en selfverryking, eindelik ’n stokkie voor die donker bedrywighede van Kungwini en Nokeng se stadsrade en amptenary gesteek word.

Verblydend is die feit dat ’n omgewingskonsultant nou moet pa staan vir beweerde ongeruimdhede by impakstudies. Dit spreek boekdele dat hy as die eerste konsultant wat in gevolge die Nasionale Omgewingsbestuurswet aangekla word, juis ook sake in Kungwini se gebied doen.

Die bewering dat die konsultant die munisipale owerheid glo ‘bedrieg’ het met sy impakstudies, sluk ons effe swaar aan, maar hopelik sal die feite voor die hof bedrieër en bedriegde se rolle duidelik uiteensit.

In Zwavelpoort is inwoners op hulle agterpote oor elf nuwe beoogde ontwikkelings, waarvan sommige hoë digtheid behuising behels. Dit in ’n landelike omgewing waar infrastruktuur bykans afwesig of erg pateties is.

Volgens André Erasmus van die Zwavelpoortse Huiseienaarsvereniging, is die ‘wurms besig om die houtwerk te verlaat’ soos die Engelse sou sê.

Dit is eintlik jare reeds ’n ope geheim dat die ‘beginsel’ van gunste vir gawes by Kungwini en ook Dinokeng aan die orde van die dag is. In die verlede het enkele amptenare en stadsvaders hieroor in die sop beland. Almal weet dat die soustrein egter nog volstoom voortsnel, maar tot nou toe het niemand iets daadwerkliks daaraan probeer doen nie.

Mense wat bewus is van gevalle waar goedkeuring van ontwikkelings met gunste en gawes gepaard gegaan het, word genoop om met André in aanraking te kom. (Lees die berig op bl. 29.)

Die munisipaliteit van Nokeng is ’n wyle gelede weens ‘finansiële wanbestuur’ onder administrasie geplaas. Dit beteken nie noodwendig dat selfverryking en korrupsie teenwoordig was nie, maar dit sou ons nie verstom as ook hier ’n aantal wurms uitpeul wat van meer as blote onbekwaamheid sou kon getuig nie. Die goeie nuus is dat ’n nuwe samehorigheid onder die mense wat gebuk gaan onder die twee munisipaliteite se vergrype, posgevat het.

’n Keelvolheid teen die patetiese spulletjie wat veronderstel is om munisipale owerhede te wees, is duidelik onder belastingbetalers bereik. Louis Meintjies van die Dinokeng Grondeienaarsvereniging som dit uitstekend op as hy sê:

“Ons moet verseker dat elke inwoner die reg het om hom te verweer teen disfunksionele en korrupte munisipaliteite wat ’n put geword het waarin geld verdwyn sonder enige teenprestasie en wat in wese slegs verseker dat die amptenare se lewensstandaard onderhou word.”