Groot planne vir negende jaar Print E-mail
News - Kommentaar
Friday, 24 September 2010 07:36
Untitled Document

Die Bronnie is dié maand agt jaar oud. En soos met ons vorige verjaarmaande, loop ons in hierdie uitgawe met dankbaarheid terug op die pad wat ons tot by die mylpaal gebring het. Ons onthou van die besonderse mense, die diere, die kuierslae, en die toekadae wat ons sedert September 2002 met ons lesers kon deel.

Dit is julle, ons lesers, wat daarvoor gesorg het dat Die Bronberger, teen baie se verwagting in, die mas opgekom en daarby ook die afgelope agt jaar deurlopend gegroei het. Vir ’n onafhanklike tydskrif om dit sonder die steun van enige groot publikasiegroep of organisasie in ’n uiters mededingende mark te kan doen, is werklik iets om voor dankbaar te wees.

Van daardie eerste uitgawe in 2002 af het die mense van die Bronberg-gebied hulle eie tydskrif verwelkom, gekoester en ondersteun. Hoe ondersteun jy ’n gratis publikasie? Die antwoord is; deur geesdriftige en omvattende meelewing. Die ongekende hoeveelhede briewe, oproepe, wenke en voorstelle het ons gou laat besef dat die mense hulle tydskrif deeglik lees en dit as hulle eie beskou. Uiters belangrik is dat dié lojale meelewing daartoe gelei het dat ons gewaardeerde adverteerders goed ondersteun word.

Dis ’n kringlopende simbiose. Sonder ons adverteerders kan ons nie voortbestaan nie. En sonder ons lesers se ondersteuning van ons adverteerders, sal die advertensies nie die gewenste uitwerking hê nie en sal hulle nie adverteer nie. Maar advertensies in Die Bronberger werk en dit werk omdat die tydskrif deeglik en wyd gelees word.

Ons het in die heel eerste tydskrif agt jaar gelede net agt adverteerders gehad. Insiggewend is dat vyf van dié agt vandag nog gereeld of sporadies by ons adverteer. Met ons heel eerste verjaardag-uitgawe het ons 45 adverteerders gehad. Hiervan adverteer 31 vandag nog by ons. Ons het ons vierde verjaardag met 74 advertensie gevier, ons vyfde met 90 en 110 doen mee aan hierdie uitgawe.

Die afgelope jaar was oor die algemeen ekonomies nie ’n goeie een nie. Daarom is ons des te meer dankbaar daarvoor dat ons lojale adverteerders by ons gebly het en dat nuwes hulle by ons aangesluit het. Maar ons kyk nie net met dié spesiale uitgawe terug op ons pad nie, ons kyk ook met geesdrif vorentoe. In ons negende bestaansjaar is dit ons voorneme om die oplaag van Die Bronberger met ’n allemintige 4 000 eksemplare te vergroot.

Dit beteken dat ons die hoeveelheid eksemplare in bestaande verspreidingsgebiede, waar daar lankal ’n groterwordende vraag is, aansienlik gaan vermeerder. Dit beteken ook dat ons nuwe aarde gaan breek waar ons voorheen glad nie versprei het nie. Een gevolg hiervan sal ’n geweldige verbetering in blootstelling vir ons adverteerders wees wat natuurlik meer voete oor die drumpel vir hulle sal beteken.

Dankie dan aan ons lesers en aan ons adverteerders vir die gewaardeerde ondersteuning die afgelope agt jaar en dankie veral ook aan die klein groepie mense wat met ywer sorg dat die Bronnie elke maand verskyn.

 

© 2020 Die/The Bronberger