Laerskool Tygerpoort se geliefde oud-hoof, Nick Smit, en sy vrou Ralie neem ná 40 jaar met groot heimwee van ons kontrei afskeid. Hulle vertrek eersdaags na Reebok in die Wes-Kaap waar hulle gaan aftree.

Nick was vir 27 jaar hoof van Laerskool Tygerpoort en het aan die einde van 2006 afgetree na 36 jaar in die Onderwys.

“Hy het diep spore getrap in so baie ouers en kinders se harte en in hierdie gemeenskap; ouers wat eens kinders in sy skool was, en toe self kinders in sy skool gehad het,” sê buurvrou Susan Strauss.

Met Nick se aankoms by Tygerpoort as waarnemende hoof in 1979 was daar slegs 226 leerders en 10 personeellede. Nick het dadelik ’n groot klomp plante uit sy en Ralie se eie tuin in Lynnwoodrif aangery en in 1980 is daar ’n besproeiinggsdam agter by die arbeiderskwartiere gebou. Later het Nick en die arbeiders pype vir besproeiing gelê.

Nick en Ralie Smit
Foto: Susan Strauss

Kuikens
In 1981 is daar begin met die bou van twee tennisbane en soos by die meeste klein skooltjies was die beskikbaarheid van fondse redelik beperk. Ouers en personeel was moeg vir pannekoekbak en kermisse reel om fondse in te samel.

Dit is toe dat Nick voorgestel het dat daar na alternatiewe maniere gesoek moet word om fondse in te kry. Daar is besluit om kuikens aan te koop en aan gesinne uit te deel met die doel dat die kinders (en ouers) die kuikens sou grootmaak en dan later slag om die slaghoenders weer te verkoop. Gesinne het hokke gebou, party kuikentjies het dit nie gemaak nie, maar aan die einde van die projek kon die tennisbane gebou word.

Baie interessante stories kan oor hierdie projek vertel word. Kinders het so lief geraak vir die kuikens dat die ouers die projek uit hulle sakke gefinansier het. Kuikens het selfs saam met die gesinne vakansie gaan hou.

Plotjol
Daar is vir jare Plotjol gehou en besoekers het van oral gekom om hierdie groot fondsinsamelingsprojek te ondersteun. Een kostelike herinnering is die gesprek tussen die seuntjie en sy juffrou na ’n aand met Lucas Maree. Lucas het op ’n donkiekar om die atletiekbaan gery en almal met sy kitaarspel en sang vermaak. Hy het so ’n lang kaftan gedra en met ’n welige bos baard gespog.

Die volgende Maandag kom die graad twee seuntjie by sy juffrou aangehardloop en vertel haar dat liewe Jesus ook by die Plotjol was. “Hy het op ’n donkiekar gery, gesing en dan het hy boonop nog kitaar gespeel!”

Grasplant
Tot 1984 het die leerders rugby op ’n grondoppervlakte gespeel met ’n gekners van tande en stukkende boude. Daardie jaar het Nick en Ralie die rugbyveld met die nuutaangekoopte Vaaljapie geploeg en daarna gelyk gemaak sodat die leerders die gras self kan plant.

Dit was ’n groot gebeurtenis; elke gesin het ’n streepsak ranke gebring en die entoesiastiese personeel en kinders het een skooldag gebruik om die nodige te doen. Die hele voetbalveld is geplant en ongeveer drie jaar later is die rugbyveld geskil en die sooie is op die atletiekbaan en netbalvelde gelê.

In dieselfde jaar is daar paviljoene opgerig. Later is spreiligte by die rugbyveld opgerig, ’n ablusieblok gebou, ’n krieketakademie deur ouers gevestig en twee turfkrieketblaaie aangelê.

Uit dié beskeie begin het die terrein ontwikkel sodat die skool vandag kan spog met twee rugby- en krieketvelde, vier weervaste tennisbane, vier sagtebalvelde en agt netbalbane.

Kultuur
Op kultuurgebied het baie gebeur: senior- en juniorkore is begin, nuwe koordrag is gemaak en het hulle het aan byeenkomste begin deelgeneem, soos Eisteddfod, koorkompetisies en skoolbyeenkomste.

Interne redenaarskompetisies is gehou waaruit wenners per graadgroep aangewys is wat aan die Eisteddfod en skolekompetisies kon gaan deelneem.

Op akademiese gebied vergelyk Laerskool Tygerpoort se onderrigstandaarde baie gunstig met die nabye spogskole in die ooste. Om die skool se standaarde te meet is daar besluit om aan Amesa deel te neem. Die Amesa-vraestelle word deur eksterne eksaminatore opgestel en word nasionaal geskryf.

Tussen 600 en 700 skole neem daaraan deel en Tygerpoort het selfs soms onder die 10 beste skole geëindig.

Saal
In Nick se termyn is onderriglokale, ’n media- en rekenaarsentrum, administratiewe kantore en ’n hoofdewoning opgerig. Graad 0-klasse is ook met Karin van der Merwe as Tygieland se eerste graad 0-juffrou, begin. In Nick se laaste jaar, 2006, is daar begin met die bou van ’n nuwe saal. Die asbessaaltjie, wat nou as klaskamers aangewend word, het hopeloos te klein geword.

Die ouergemeenskap se jarelange droom om ’n groter saal te bou is uiteindelik verwesenlik en na voltooiing is daar besluit om die saal na Nick Smit te vernoem uit erkenning vir sy positiewe bydrae oor die jare.