Die tagtigjarige Emus Erasmus is op 23 Junie in die familiekerkhof by die Erasmuskasteel, bekend as die Spookhuis, begrawe.

Emus, die laaste geregistreerde eienaar van die kasteel, is langs sy oupa Jochem, die eerste eienaar, te ruste gelê.

Emus se oupa, Jochemus Johannes Petrus Erasmus, is op 30 Augustus 1863 in Pretoria gebore. Hy is getroud met Johanna Jacoba van Schalkwyk en hulle het die Erasmuskasteel in 1903 laat bou.

Plaas
Jochemus was die tweede seun van Carel Jacobus Erasmus wat ’n deel van die plaas Garstfontein, waarop die kasteel gebou is, besit het. In 1900 is die plaas Garstfontein reeds soveel keer onderverdeel dat die lys van eienaars op 13 persone gestaan het.

Carel is in 1832 gebore en is getroud met Martha Louisa Prinsloo.

Hy is in 1902 oorlede, net ’n jaar voordat sy seun Jochemus die kasteel laat bou het. Toe Jochemus se seun Carel in 1917 aan melaatsheid oorlede is, het sy broer Albertus Phillipus Jacobus Erasmus oorgebly om die kasteel eendag te erf. Albertus het egter nooit volle beheer oor die Erasmuskasteel gehad nie, omdat hy voor sy moeder dood is in die plaashuis op Waterkloof.

Emus Erasmus sewe jaar gelede met die viering van die Erasmus-kasteel se 100ste bestaansjaar
Foto: ER Lombard

Skei
Albertus is op 20 Oktober 1899 gebore en was getroud met Gertruida Johanna Mulder van wie hy later geskei is. Emus was Albertus se seun en sy doopname was Jochemus Rasmus Erasmus. Hy is in 1930 gebore en ná sy ouers se egskeiding is sy ma weg Kimberley toe. Met sy pa se afsterwe, toe Emus 14 jaar oud was, is hy na sy ma toe gestuur.

Emus sou die grootste deel van sy pa se boedel, wat ’n gedeelte van die plaas Waterkloof 378 JR, die plaas Garstfontein 374 JR en die Erasmuskasteel insluit, kry as hy 30 jaar oud word.

Onteien
Hy het in 1960 dertig geword, en het die kasteel net 16 jaar besit voor hy in 1976 onteien is deur die destydse Transvaalse werkedepartement wat beplan het om ’n akademiese hospitaal daar te bou. Die hospitaal is nooit gebou nie. Krygkor het die grond eers in 1986 gekoop en begin om die kasteel te restoureer.

Die familiebegraafplaas was oorspronklik in die nabygeleë plantasie langs die ou militêre pad. Die grafte moes geskuif word om plek te maak vir nuwe paaie en Avbob het in 1988 opdrag ontvang om 33 van die grafte na die Erasmuskasteel te skuif vir ’n herbegrafnis.

Die nuwe begraafplaas, waar die grafte in hul oorspronklike volgorde geplaas is, is omring deur die muur van die ou beeskraal en is op militêre grond.

Emus se begrafnisdiens is in die NG Kerk Oosterlig in Waterkloof Glen gehou. Hy word oorleef deur sy enigste kind, Carl, en kleinseun, Emus jr.