In dié maand se uitgawe is ’n omvattende kontaklys wat na ons mening onontbeerlik is vir die mense wat die Bronberg-gebied as woonplek gekies het.

Dit is nie ’n gewone kontaklys, soos dié waaraan ’n mens al gewoond geraak het nie. Die gewone ‘noodnommerlys’ word al te dikwels as ‘vullers’ in publikasies gebruik om ’n ‘gat’ toe te maak by die gebrek aan iets sinvol om te plaas. Dié soort lysies, met nommers van polisie, ambulans, brandweer en só (dikwels verouderd) word ook wyd vervuil agter op advertensiebiljette, of iewers op jou jaarlikse gratis almanak.

Jy sal die gewone ‘noodnommers’ ook in die inligtingstuk van Die Bronberger kry, maar jy gaan baie meer kry.

Jy sal byvoorbeeld nou ook alternatiewe selfoonnommers kry vir die kere wat onbevredigende of (behoede ons) geen reaksie by die noodnommer gekry word nie. Ons lys is ’n uitgebreide een met nie net noodnommers nie, maar ook met ’n magdom nodige en nuttige nommers om byderhand te hou.

Die Bronberger kry deurlopend navrae van lesers wat op soek is na die kontaknommers van wyd uiteenlopende aard. Waar ons kan, help ons graag en gebeur dit dat ons nie ’n betrokke nommer voor die vingerpunte het nie, vind ons telkens uit en laat weet die leser wat navraag gedoen het.

Die gevolg is dat ons ná bykans agt jaar met ’n lywige kontaklys op hande sit. ’n Lys met waardevolle inligting wat ons graag met ons lesers wil deel.

Hierdie uitgawe van Die Bronberger is een wat byderhand gehou behoort te word. Dit kan nie net die lewe vir jou geriefliker maak nie, maar kan bes moontlik ook lewens red. Die plan is om die lys op ’n jaarlikse basis op datum te hou. Vervat in die lys, sal jy ook die kontakbesonderhede van ’n hele aantal mense kry wat ’n groot verskil in die Bronberg-wêreld maak. Mense wat onbaatsugtig hulle tyd en sweet gee om die lewe vir die gemeenskap draagliker en veiliger te maak. Mense wat omgee.

Dikwels word hierdie gemeenskapsdiens agter die skerms gedoen en weet ons min of niks van die mense wat daarmee besig is nie. Mense waarvoor die hoed gerus afgehaal kan word. Daarom het ons besluit om ons lesers voortaan in ’n gereelde rubriek voor te stel aan hulle. Die eerste aflewering van die rubriek ‘Ons haal die hoed af vir . . .’ sal reeds volgende maand verskyn.

Lesers wat van mense weet waarvoor die hoed afgehaal kan word, kan ons gerus met voorstelle kontak.