Wat agter die skerms by konsert gebeur Print E-mail
News - Ons Mense
Thursday, 24 June 2010 18:22
Untitled Document

Wie ken die storie agter die storie van die Laerskool Tygerpoort se suksesvolle konsert op Vrydag 21 Mei?

Dié is nie net ’n verhaal van ’n groot opkoms by die konsert waar Nadine en die groep Eden opgetree het nie. Agter die skerms het polisiereserviste en winkelsentrumsekuriteitswagte gratis saamgestaan om seker te maak dat die aand glad verloop.

Adjudant offisier Wynand van der Merwe van die SAPD Boschkop se misdaadvoorkomingseenheid sê dat so ’n groot byeenkoms enige polisieman se nagmerrie is. “Wie gaan nou weer ’n kar steel? En soos almal weet, het ons ou stasietjie maar min personeel,” sê Wynand.


R/kst Bennie Malan, links, sanger Nadine, en R/kst Theo van Rensen, regs
Foto: AO Wynand van der Merwe

Gelukkig het Boschkop ’n staatmaker reservistediens onder leiding van reservis-konstabel Bennie Malan van Mooiplaats. Twee dae voor die tyd bel Wynand toe vir Bennie en op die Vrydagaand is daar twee voertuie en vyf reserviste by die skool, paraat en hulpvaardig. Bennie en mede-reserviskonstabel Theo van Rensen het selfs ’n ‘lyfwag diens’ aan Nadine gebied.

Jean Jonker, sekuriteitsbestuurder van Hazeldean winkelsentrum, het gehelp deur die dienste van twee van sy karwagte kosteloos aan Wynand te bied. “Dié twee het die aand buite om die skool gesorg dat almal die konsert kon geniet sonder om benoud te voel oor ’n sluwe karboef.”

“Alles het klop-disselboom verloop, behalwe ’n paar kindertjies wat afgedwaal het van mamma en pappa. Verder was daar geen voorvalle van misdaad nie en die verdwaaldes is vinnig en met baie vertroosting weer by ma uitgebring met betraande gesiggies en al,” sê Wynand.

 

© 2020 Die/The Bronberger