Wintermark wil sokkergeesdriftiges lok Print E-mail
News - Ons Mense
Thursday, 20 May 2010 17:46
Untitled Document

Die Nickel Wintermark, wat spesiaal met die oog op die groot sokker gebeure in Suid- Afrika gehou word, is van 16 tot 26 Junie by Paul Jungnickelhuis.

Dié mark is ’n voortsetting van die Nickel Kersmark wat die afgelope nege jaar gehou word. Die doel is om die talente van ons minder bevoorregte mense ook bekend te stel aan die oorsese toeris en aan almal wat in die lang skoolvakansie met Jan Tuisbly se karretjie ry.

By die Nickel Wintermark kan jy ’n verskeidenheid items kry wat handgemaak is deur organisasies vir gestremdes en werkskeppingsprojekte. Tradisionele Suid-Afrikaanse items sal ook beskikbaar wees soos koeksisters, beskuit, kralewerk en biltong.


Die Nickel Wintermark is ?n voortsetting van die Nickel Kersmark

Werkskepping is ’n groot probleem vir volwasse gestremde persone. Kungwini Welsyn is ’n nie-winsgewende organisasie met verskeie projekte vir volwasse gestremdes, kleuters, tieners, werkswinkel vir gestremdes en werkskepping.

Paul Jungnickelhuis is een van Kungwini Welsyn se projekte waar na 140 volwasse persone met gestremdhede omgesien word. Omdat slegs 35% van dié tehuis se inkomste in die vorm van subsidie ontvang word is fondsinsameling altyd deel van hul bestaan.

By die mark gaan daar ook ’n teetuin met ’n verskeidenheid geregte wees. Vetkoek, kerrie en rys, malvapoeding, worsbroodjies en bobotie sal te koop wees. Kredietkaart-fasiliteite sal beskikbaar wees en die mark is daagliks van 9 vm tot 5 nm oop, insluitende Sondae en openbare vakansiedae.

Nickel Wintermark is op plot 214 Zwavelpoort in Lynnwoodweg-verlenging (Grahamweg). Skakel 012-809-0020/1 of besoek www.kwo.org.za vir ’n kaart en meer inligting.

 

© 2020 Die/The Bronberger