Toe Cullinan se ou Stasie Restaurant destyds sy deure sluit, was dit ?n hartseer affêre vir my en Metgesel. Ons was van die gewoonte om elke dan en wan te heerlik in die unieke atmosfeer van die ou perron te loop uitspan.

Daarom was ons bly om te sien die stasieplek is weer oop, dié keer as ?Oppistasie Restaurant?. Ons sit een Saterdag af soontoe en ons vat vir Vriend saam. Jy kan aan die oostekant van die stasie stilhou en dan sommer oor die spore na die kuierplek toe stap.

Hulle het op die perron netjiese tafels onder sambrele staangemaak en binne baksteenbankies ala ?diner? gebou. Half jammer dat dit effe afbreek doen aan die geskiedkundige ou plek wat uit 1902 dateer, dink ek. Ons sit op die perron en word flink en vriendelik bedien.

Vriend wys ons daarop dat Oppistasie se pryse deurgaans heelwat sagter op die beursie is, as wat die meeste plekke in die stad s?n is. Die voorgeregte kos bykans deur die bank R20, of jy nou hoenderlewers, slakke of spring rolls bestel. Die verskeidenheid slaaie wissel van R20 tot R45. Pastageregte is almal R40, Bobotie en Lasagne kos R45. ?n Eisbein jaag jou R69 uit die sak en ?n 500g T-been R70.

Oppistasie bied ?n unieke ouwêreldse atmosfeer

Die spyskaart spog met ?n hele aantal hoender- en visgeregte, burgers vanaf R25, ?n verskeidenheid toebrode en ander ligter geregte en ?n goeie keuse braaigeregte.

Vriend besluit op die oxtail stew, maar die kelner kom terug met die mededeling dat hulle net ?gewone? oxtail het. Volgens hom is die gewone beesstert voortreflik, al vind hy die sous effe aan die dun kant. Dit kos R59 en kom saam met rys en groente.

Metgesel se calamari geniet sy saam met gebakte aartappel en groente. Sy meen jy sal ver soek vir beter. Dit kos R40.

My hoenderpastei teen R45 kom aan onder ?n fantastiese kors wat so half middelpaadjie gekam is en my laat dink dis eintlik ?n dubbele porsie. Dis ?n hoenderpastei soos wat jy met Kersete by jou ouma of ma geniet het. Gasvrou, Vivienne Marais, bring ?n ongelooflike, tuisgemaakte brandsousie aan wat nommerpas vir die pastei is.

Die nuwe plek op die stasie kan sonder skroom vir ?n gemaklike kuier en goeie kos aanbeveel word.

Moetproe van die maand
Die nuwe Bronberg Vleismark by die ou Zwavelpoort Sentrum se boerewors. Eienaar, Wilhelm, bring die watertand-resep uit die diep Wes- Transvaal saam.