Inwoners van Cullinan het op Saterdag 25 Oktober ’n skoonmaakdag by die Cullinan-polisiestasie gehou. Mense gewapen met skoonmaakmiddels, skuurpapier, verf, rollers en kwasse, lere, kompos en plantjies het om 7.30 vm begin opdaag.

Karin Yssel van die Cullinanse Gemeenskappolisiëringsforum sê dat die dag ’n reuse sukses was en dat sy trots is op elke liewe mens wat hand bygesit het. “Julle het ’n wonderlike werk gedoen en die polisiestasie lyk fantasties.”

Raadslid JB Bekker het gesê dat dit is wat gebeur wanneer plaaslike ondernemings, inwoners en lede van die gemeenskappolisiëringsforum hulle moue oprol en saamwerk. “Die polisiestasie weerspieël nou die trots en omgee van die gemeenskap wat dit dien.”