’n Bronberger wat nog nooit geskroom het om enige tyd van die dag of nag sy gemeenskap by te staan nie, se gesin het nou hulp nodig. Mike Strange se een-jaar-oue kleinseun, Lian Marais, is krities siek en moet ’n hartoorplanting kry. Lian is Mike se dogter, Lee-Ann, se seun. Sy en haar man, Ruan Marais, het dringend hulp nodig vir kostes wat nie deur hul mediese fonds gedek word nie.

Lesers het Mike oor die jare leer ken as die Mooiplaatser wat by bykans alle gemeenskapsveiligheidsinstansies betrokke is. In September verlede jaar het ons berig dat Mike en die ‘beast’ - ’n bloedrooi vuurvegter geskenk aan die Mooiplaats Veiligheidsinisiatief (MVI) deur British 4x4 – hul staal behoorlik getoon het in die brandseisoen.

Lian se oupa, Mike Strange

Mike is ’n komiteelid van die Magalies- Bronberg Grondeienaarsvereniging, die MVI en die Boschkopse Gemeenskapspolisiëringforum. Enige een in die groter Bronberggemeenskap wat ooit in die moeilikheid was, het ervaar dat hulle enige tyd op Mike se knoppie kan druk. Soos Petro Anderson van die Zwavelpoortse Veiligheidsinisiatief sê, Mike is altyd beskikbaar om te help.

Nou het Mike die gemeenskap se hulp nodig om sy kleinseun se lewe te probeer red. Lian Marais is blakend gesond in die Pretoria-Oos Hospitaal op 28 Januarie verlede jaar gebore. Met sy 10 dae-ondersoek het Lian se pediater hom as ’n gesonde, gelukkige baba beskryf. Toe Lian skaars vyf weke oud was, is hy die oggend van 5 Maart opgeneem in die hospitaal nadat hy vir twee dae gebraak het en sy urienuitskeiding min was. Die pediater het abnormaliteit opgetel en het hom dadelik na die intensiewesorgeenheid oorgeplaas. Lian is daar met biventrikulêre hartversaking gediagnoseer en op ’n ventilator geplaas.

Lian in die hospitaal
Foto: Lee-Ann & Ruan Marais

Ná vele toetse en oorplasings na ander hospitale is Lian permanent op hartversaking-medikasie geplaas, maar sy toestand het aanhou vererger. Die dokters het besluit om Lian te laat evalueer vir ’n hartoorplanting asook ’n moontlike mitrale klepherstelling.

Hy en sy ouers was in September verlede jaar by die Christian Barnard Gedenkhospitaal in Kaapstad waar hulle die hartoorplantingspan ontmoet het. Dié span se toetse het bevind dat daar nie veel is wat vir Lian gedoen kan word nie. Klepherstelling gaan nie moontlik wees nie en ’n hartoorplanting is die enigste opsie.

Lian is op ’n waglys vir ’n nuwe hart geplaas en huis toe gestuur. Hy is op 29 Januarie in Unitas Hospitaal opgeneem met longontsteking en het sy eerste verjaarsdag in die intensiewesorgeenheid deurgebring. Lian is ontslaan op 5 Februarie, maar sy hartversaking lei na ’n reeks ander probleme soos lewer- en nierversaking. Sy hartfunksie is tans 17% en hy moet in ’n sittende posisie slaap.

Lian Marais het ?n hartoorplanting nodig
Foto: Lee-Ann & Ruan Marais

Mike sê dat mediese en verwante kostes meer is as die gesin se inkomste. Daarom het hulle ’n trustfonds vir Lian gestig. Bydraes kan gemaak word aan: Wessel Ooshuizen Prokureurs Trust, ABSA bank Centurion, takkode: 630445, Rekeningnommer: 4044027991, verwysing: Baba Marias. Kontak die Wessel Oosthuizen Prokureurs Trust by tel: 012-654-1438, faks: 012-654-7444 of e-pos: This e-mail address is being protected from spambots. You need JavaScript enabled to view it .

Lian is die jongste pasiënt in Suid- Afrika wat wag vir ’n hartoorplanting en kan tot ’n vyf-jaar-oue hart ontvang. Sy ma en pa sê dat indien hierdie lewe nie vir Lian bedoel is nie, alle oorblywende fondse onder leiding van Wessel Oosthuizen Prokureurs gebruik sal word om orgaanskenking te bevorder en om ander in ’n soortgelyke situasie te help.