Tannie Annetjie Coetzee is op Donderdag 22 Oktober, knap drie maande voor haar honderdste verjaardag, oorlede.

Vroeër vanjaar het ons berig dat tannie Annetjie, ’n mezzosopraan, nog nootvas en helder gesing het in haar 99ste jaar. Sy het van jongs af in musiek belanggestel en het studeer aan die Nasionale Akademie vir Musiek op Stellenbosch waar sy lisensiaat- sertifikate in klavier en sang ontvang het en in die akademie-orkes as tjellospeler opgetree het.

Annetjie Coetzee

Tannie Annetjie het ook ’n diploma in toneelspel verwerf en sy kon skilder, hekel, hoede maak, emaljewerk-, pottebakkers- en houtsneewerk doen. Van haar werk is opgeneem in die Nasionale Kultuurhistoriese Museum in Skinnerstraat.

Anna Maria du Plessis is op 30 Januarie 1910 in Rustenburg gebore. Sy was getroud met Nicohlaas Abraham Coetzee en hulle het twee dogters, Emmerenske Margaretha (Mieke) en Francoise Christien (Franni).

Die begrafnis het Vrydag 30 Oktober uit die Paul Kruger Kerk, Kerkstraat, plaasgevind. Die ter aarde bestelling was by Sandfontein begraafplaas.