Nuwe Mooiplaats-kraglyn kan verwoesting saai PDF Print E-mail
News - Aktueel
Thursday, 15 October 2009 23:10
Untitled Document

Mooiplaats-inwoners vrees dat ’n beoogde oorhoofse kraglyn van nege kilometer lank, verwoesting op hul plotte gaan saai. Renell van Staden van Mooiplaats sê dit is met skok dat hulle verneem het van dié kraglyn wat beplan word. “Hierdie lyn sal dig voor ons grasdakhuis verbyloop en ons huis sal heel waarskynlik gesloop moet word,” sê sy.

’n Serwituut van 31 meter wyd word benodig vir dié oorhoofse kraglyn wat oor die volgende plotte gaan loop: Gedeeltes 2, 19, 41, 42, 44 en 45 van die plaas Zwartkoppies 364 JR en gedeeltes 115, 116, 165, 168, 171, 172, 204, 205, 206, 207, 223, 336, 354 en 367 van die plaas Mooiplaats 367 JR.


?n Nege kilometer lange oorhoofse kraglyn word van Hatherley tot Mooiplaats beplan

Substasie
Die Tshwane Metroraad se Openbare Werke en Infrastruktuurontwikkeling, Energie en Elektrisiteitafdeling het aansoek gedoen by die Gautengse Departement Landbou en Landelike Ontwikkeling om dié 132 V oorhoofse kragkabel te installeer vanaf die Wildebees substasie by Hatherley tot die voorgestelde een hektaar Mooiplaats substasie.

Dié projek word aangepak omdat die Tshwane Metroraad nodig het om die 132 kV elektrisiteitsubstasienetwerk van die ooste van Pretoria na die noorde, tot by Roodeplaatdam, te versterk om voorsiening te maak vir die krag wat nuwe ontwikkelings, veral in die ooste, nodig gaan hê.

Die Mooiplaats substasie sal nuwe ontwikkelings, nie verder as 4 km van die stasie af nie, bedien. Daar is geen primêre 132/11 kV substasie in dié gebied nie en krag word tydelik voorsien van die Wapadrand substasie met 11 kV oorhoofse kraglyne.

Benadeel
Renell maak beswaar daarteen dat “hierdie onooglike omgewingsbesoedeling beplan word om nuwe ontwikkelings van krag te voorsien. Dit is weereens ’n geval waar gewetenlose ontwikkelaars en owerhede saamspan en die omgewing en sy mense ernstig benadeel,” sê Renell.

“Ons het reeds as beswaarmakers geregistreer en doen ’n beroep op grondeienaars in die omgewing om dieselfde te doen. As genoeg mense kapsie maak, sal hulle moet oorweging skenk om na alternatiewe roetes en metodes te kyk.”

Probleme
Seedcracker Omgewingskonsultante is aangestel om die omgewingsimpakstudie, wat die openbare deelnameproses insluit, te doen.

Probleme wat aangespreek word, sluit die volgende in: potensiële oppervlakwaterbesoedeling, grondversteuring en besoedeling, gronderosie, geotegniese stabiliteit, impak op die diere en plante, habitatversteuring of -verlies, veiligheid, gesondheid en sekuriteit, die impak op terreine van historiese waarde, visuele impak en die kwaliteit van lewensomgewing. Alternatiewe roetes en terreine vir die substasie en toringstrukture sal in die studies aangespreek word.

Beswaar
Inwoners wat teen die oorhoofse kraglyn en Mooiplaats substasie beswaar wil maak, moet voor 26 Oktober registreer as belanghebbende partye. Om te registreer, kontak Stephanie Webber van Seedcracker Omgewingskonsultante by tel 082-626-4117, faks 086-518-4885, e-pos This e-mail address is being protected from spambots. You need JavaScript enabled to view it of stuur ’n brief na Posbus 12460, Clubview, Centurion, 0014.

Belanghebbende partye word uitgenooi om ’n openbare vergadering oor die voorgestelde kraglyn by te woon op 26 Oktober by Kitty Hawk op die Boschkoppad van 6 nm tot 8 nm. Alternatiewe roetes en die noodsaaklikheid van die kraglyn sal op die vergadering bespreek word en belanghebbende partye word uitgenooi om hul menings te gee en besware te opper.

 

© 2019 Die/The Bronberger