?n Misverstand in die Pik-en-Petaal PDF Print E-mail
News - Ou Poon se plotpraatjies
Monday, 21 September 2009 14:38
Untitled Document

As ’n ou perd wat al baie lank die dorre wintergras en ook die soet lentelote hier teen die hang van die Bronberg ervaar, het ek een ding deeglik geleer. Wel, eintlik het ek al baie goed geleer, maar een ding wat soos ’n paal bo die waarheid uitstaan, is dat onskuldige misverstande vir die grootste moeilikheid kan sorg.

Só was dit dan ook ’n misverstand wat anderdag bykans katastrofiese moles in ou Gawie se huis veroorsaak het.

Ou Gawie is ’n goeie ou. Nie een wat hom sommer oorgee aan die vergrype en versoekings wat op ’n man se lewenspad opduik nie. Nou vertel ou Gawie dat hy op ’n mooi dag in die groot dorp die nodige aankope by Nico se Pik-en-Petaal loop doen het. Hy staan nog so en kopkrap agter sy trollewaentjie by die wynrak, sê Gawie, toe sien hy daar van die groente se kant af ’n aanvallige jonge dame wat lyk of sy vir hom waai. En sy glimlag mooitjies in sy rigting en sy waai weer, sê hy. Duidelik vir hom, waai sy.

Gawie sê hy rek sy onthouding al die kante toe, maar hy kan om de dood nie dink waar hy die jonge dame vandaan ken nie. Sy lyk effens bekend, maar dis waar sy onthouding ophou, sê Gawie. Hy wonder of dit dalk een van sy vrou se vriendinne kan wees, maar dan besef hy nie een van sy vrou se vriendinne is naasteby só mooi nie. Hy stap nader, groet vriendelik, soos dit ’n ordentlike ou betaam, en vra toe maar: “Jong, waar ken ons mekaar vandaan?”

Die antwoord wat ou Gawie kry, skud hom tot in sy diepste wese: “Ek dink jy is die pa van een van my kinders,” sê die mooie mens steeds met ’n gawe glimlag op haar fraai gesiggie.

Nou sê ou Gawie dat hy nie iemand is wat sommer oor die tou sal trap met ’n vreemde vrou nie. Sy kop maal teen ’n honderd myl per uur soos hy terugdink oor sy getroude lewe en oor sy lewe voor dit heen. En dan gaan daar vir hom stadig ’n liggie op, sê ou Gawie. “Is jy daardie paaldanser wat ek destyds op ou Gert se ramparty raakgedrink het? Die een wat my agterna R500 gevra het?” wil Gawie weet.

“Nee,” sê die vrou, “ek is jou seuntjie se onderwyseres. “En ek drink juis vanmiddag tee saam met jou vrou.”

Leer die taal
Gert Mossie sê daar sal sommer baie minder misverstande en moeilikheid wees as mans net die taal van die vrouegeslag wil aanleer. Soos wat hy deur die jare gedoen het, sê Gert en hy gee goedgunstiglik ’n paar voorbeelde van wat vrouens sê en wat dit eintlik beteken sodat ou Poon dit met die oningeligte mans onder ons kan deel:

Ons het dit nodig = Ek wil dit hê.

Maak maar soos jy wil = Doen dit en jy bars.

Ons moet praat = Ek wil kla en jy moet luister.

Jy luister nie na my nie = Jy stem nie met my saam nie.

Nee, ek is nie kwaad nie = Ek is de duiwel in.

Dis jou besluit = Dis ’n simpel besluit.

Ek is binne ’n minuut klaar = Skop maar jou skoene uit en sit die TV aan.

 

© 2019 Die/The Bronberger