In dié rubriek voorsien inspekteur Wynand van der Merwe, hoof van Sigbare Polisiëring, SAPD Boschkop, nuttige landelike veiligheidswenke

Inspekteur Wynand van der Merwe

’n Goeie waghond is een van die beste maniere om misdaad hok te slaan. Jy soek nie noodwendig ’n jong beer nie; klein honde werk net so goed. Die geheim lê daarin om jou honde se ‘blaf-taal’ te leer ken. Wanneer blaf Killer vir ’n haas of vir die maan, en wanneer blaf Flaffie vir aanvallers op die perseel.

Die voordeel van goeie waghonde is dat hulle batterye nie pap word nie. Die vlaag vergiftigings is egter ’n groot probleem in ons omgewing. Baie mense hou nie van die idee dat hulle honde in die huis slaap nie en glo dat die honde buite moet wees om die werf op te pas.

Wat is egter meer werd? Jou gesin se veiligheid, of jou besittings? Honde in ’n huis kan die inwoners vinnig wakker maak wanneer aanvallers toegang tot die woning probeer verkry. Dit gee jou kans om jou verdediging betyds reg te kry. Leer jou hond. ’n Ongeleerde hond is soos ’n gelaaide wapen in ’n kind se hand. Leer jou honde om nie kos van ander persone te neem of van die grond af te vreet nie. Wees op die uitkyk vir vreemde stukke kos op die werf. Dit kan straks gif wees. Statistiek bewys dat huisbraak of ’n plaasaanval binne 14 dae nadat honde vergiftig is, plaasvind. Kry so gou as moontlik ’n ander hond, al is dit ’n klein huis-hondjie.

Wees bedag op jou hond se gedrag as jy in die aand huis toe kom. As jou hond jou gewoonlik by die hek kom groet en skielik afwesig is, moet jy ekstra paraat wees. As jy enigsins vermoed dat iemand op die perseel is en jou inwag, moet jy nie ingaan nie. Skakel die SAPD en wag op ’n veilige plek.

Wanneer enige persoon jou erf betree en hulle voordoen as Eskomof Telkom-werkers of selfs as die SAPD, moet jy aandring op identifikasie. As so ’n persoon nie ’n identiteitskaart kan toon nie, moet jy hom onder geen omstandighede inlaat nie, al beweer hy dat hy ’n lid van die SAPD is. Moenie dat persone jou intimideer om toegang tot die woning te verkry nie. Skakel eers en bevestig dat die persone wel is wie hulle sê hulle is.

Wees bedag op ongemerkte voertuie met blou ligte wat jou van die pad probeer aftrek. Misdadigers verkry blou ligte en doen hulle voor as lede van polisie-eenhede en trek dan motoriste af en beroof hulle. As jy twyfel, deel die persoon mee dat jy tot by die naaste polisiestasie sal ry en daar stilhou. Ware polisielede sal geen probleme daarmee hê nie. As jy vermoed dat alles nie pluis is nie, skakel 112 en vra vir bystand van die SAPD. Bly op die foon met die omroeper totdat ’n gemerkte SAPD voertuig by jou is. In geval van nood, skakel 10111 of SAPS Boschkop by 012-802-1087 of 082-557-6996.