Verlede jaar in September was ons geseënd genoeg om die grootste Bronberger nog as ons verjaardaguitgawe uit te gee. Toe het ons ’n hele ses jaar oud geword. Met hierdie uitgawe vier ons ons sewende verjaardag en ja, Die Bronberger wat jy nou in die hand het, is die grootste een wat nog die lig gesien het. En daarvoor is ons sewe maal sewentig keer dankbaar.

Ons is dankbaar teenoor die handjievol mense wat oor die afgelope sewe jaar saam met ons gewerk het om maand na maand ’n eie gemeenskapspublikasie vir die mense van die Bronberg-gebied saam te stel en uit te gee.

Dit was nie altyd maklik nie, maar dit was altyd ’n plesier om ast’ware, die eerste sewe spreekwoordelike sakke sout saam met veral vier toegewyde en bekwame vroue te verorber. Hulle heet Angie, Jeanette, Tania en Elsabé. Ons is dankbaar teenoor ons lesers wat van die begin af ‘Die Bronnie’ met ope arms en harte in hulle midde verwelkom het en deur meelewing en deelname dié onafhanklike publikasie ’n integrale deel van die eiesoortige gemeenskap van die Bronberg-gebied gemaak het. Dit is ’n ongelooflike, bevredigende voorreg om ons mense met trots te hoor praat van “ons eie boekie”.

Ons is dankbaar teenoor ons adverteerders, groot en klein, gereeld of sporadies. Hulle is die lewensbloed wat Die Bronberger moontlik maak. Die ondersteuning wat ons geniet om selfs in dié knyptang ekonomiese tye ’n gesonde groei te kan toon, word oneindig baie waardeer en dien terselfdertyd as barometer vir ‘Die Bronnie’ se gewildheid onder sy lesers en hulle bereidwilligheid om ons adverteerders te ondersteun. Ons is veral dankbaar teenoor ons Skepper en die genade wat alles oor die afgelope sewe jaar moontlik gemaak het.

Ons sien met vertroue en blye afwagting uit na ons agtste bestaansjaar.