PDF Print E-mail
News - Rubrieke
Tuesday, 18 August 2009 01:56
Untitled Document

In dié rubriek voorsien inspekteur Wynand van der Merwe, hoof van Sigbare Polisiëring, SAPD Boschkop, nuttige landelike veiligheidswenke


Inspekteur Wynand van der Merwe

Plaasaanvalle is aan die toeneem, en ons hier in SAPD Boschkop-wyk het die bitter misdaad ook nie vrygespring nie. Een plaasaanval is een te veel, en daarom wil ons van SAPD Boschkop se kant af probeer om ’n paar veiligheidswenke te verskaf vir landelike beveiliging.

Saam kan plaas- of plotbewoners, en ons as die SAPD, ’n verskil maak wat lewens kan red. ’n Paar eenvoudige wenke kan die verskil tussen lewe en dood beteken.

Draadomheinings rondom die perseel is beter as hoë mure vir beter sigbaarheid van patrollerende personeel. Lemmetjiesdraad en elektriese omheinings met alarmstelsels is ook ’n goeie belegging.

As ’n elektriese heining egter onbekostigbaar is, kan ’n baie praktiese en goedkoop manier gebruik word. Maak leë blikke met klippies daarin of selfs klokke aan die bestaande omheining vas. Dit is net so ’n goeie vooraf waarskuwingstelsel. Onthou om die hekke te sluit.

Sekuriteitshekke voor alle ingangsdeure na die woning met stewige slotte en diefwering voor al die vensters is ’n moet. Dit is egter ’n goeie idee om een venster se diefwering op so ’n manier te installeer dat dit ’n miniatuur hek is wat met ’n slot sluit. Sou ’n brand in die woning uitbreek, kan die venster gebruik word vir ’n nooduitgang.

Skep ’n veilige kamer met versterkte deure, veiligheidshekke en diefwering; verkieslik die hoofslaapkamer. Die slaapkamer is die weerbaarste plek in ’n woning, sou ’n aanval of rooftog in die aand gebeur. Hou ’n selfoon in die vertrek.

Installeer ’n alarmsisteem in die woning. Daar is deesdae baie eenhede wat nie buitensporig duur is nie. Installeer ’n sirene buite op die huis se dak, wat ver gehoor kan word. Noodknoppies in die woning is ook belangrik. Plaas dit so dat dit vinnig en veilig geaktiveer kan word in ’n noodgeval.

Installeer buite-alarms wat beweging buite die woning optel. Dié soort sisteem gee ’n mens meer tyd om te reageer voordat ’n betreder in die woning is.

In noodgevalle skakel 10111 van ’n Telkomlyn of 112 van ’n selfoon of bel SAPD Boschkop by 082-557-6996.

 

© 2019 Die/The Bronberger