Dinge roer by Rafters Pub & Grill PDF Print E-mail
News - Vreethans
Tuesday, 18 August 2009 01:54
Untitled Document

Vreethans van Heerden en Metgesel besoek kuierplekke in die Bronberggebied ongenooid en betaal self vir dit wat hulle geniet, of dalk nie geniet nie

Dinge is deesdae behoorlik aan die roer by Rafters Pub & Grill op die B-House-perseel langs Garstfonteinweg-verlenging. En die afgelope Julie het ek en Metgesel ’n slag of drie meedoënloos loop meedoen aan dié geroerdery.

Elke Saterdag hou hulle byvoorbeeld nou ’n kosmark op die ruim perseel neffens Rafters. Ons sit op die eerste markdag af soontoe om dinge te loop bekyk. Netjies, onder skadudoek is ’n aantal uitstallers ingerig. ’n Verskeidenheid kosprodukte van uiteenlopende aard word te koop aangebied. In die groentetent word fluks sake gedoen.


Zack du Plessis by Rafters saam met Christa van der Merwe en Cobus Louw

Daar is vakuumverpakte vleise, ’n kaaskraampie, ’n wyntafel, groot- en klein gebak, gebottelde konserf, tuisgemaakte vleispasteie, Italiaanse geregte en verskeie ander voorafbereide kosse om van te kies. Eenkant baljaar kleingoed op ’n reuse-klimraam of staan ongeduldig en wag vir hulle beurt op ’n ponierit.

Op die boonste dek van Rafters maak ’n kêrel lekker lewendige musiek. Dis terloops die einste dek en plek waar Pretoria se Harley Davidson-klub deesdae bymekaarkom. Ons het lekker en lank geloop en koop met die oë en met die beursie ook. Wildspasteitjies in netjiese keramiekbakkies, tradisionele bobotie en hoender-al-la-koning om by die huis te gaan opwarm, pampoenkoekies en ’n emmertjie van die lekkerste melkkos wat ek nog geproe het, is onder meer in ons koopsakkies. Ek kan berig dat alles uit die boonste gestoeltes was en uiters genadiglik op die geldsak.


Springbokkaptein Wynand Claassen knoop ?n praatjie met besoekers aan

’n Gemoedelike atmosfeer heers op Rafters se groot kuierstoep waar markgangers onder geel staandakkies van seil sit en gesels en koffie of iets kouers geniet. Eddie Williamson, Rafters se eienaar, staan bont agter ’n braaier waar hy doenig is om die boerewors vir Rafters se baie gewilde voetlange worsrolle gereed te maak. Ander ouens bestel T-bene of rumps en is duidelik in hulle noppies met die eindproduk.

Omdat ons plek wil los vir die aand se groot eet aan ons kosmarkaankopies, bestel ek en Metgesel net geroosterde broodjies van kaas en tamatie. Die broodjies is smaaklik. Net reg, besluit ons. Voortaan gaan Rafters ook maandeliks op ’n Vrydag ’n middagete hou waar ’n bekende persoonlikheid genooi word om informeel met etegangers te gesels en hulle vrae te beantwoord. Só was dit die bekende akteur, Zack du Plessis, se beurt op die laaste Vrydag van verlede maand.


Faan Smuts van Bronberg Lodge en Ewoud Malan, Noord Transvaal en Springbok-haker, geniet ?n grappie

Die groot kuiervertrek, met ’n baie groot TV-skerm vir sportkyk, was behoorlik gepak toe die tyd vir Zack se praatjie aanbreek. Opvallend was die aantal oud-rugbyspelers teenwoordig. Jy kon regtig ’n volle span van oud-Springbokke en gewese provinsiale spelers in die veld stoot, sou jy wou.

Ou Zack het lekker gesels, die mense het lekker gekuier en veral lekker geëet. Rafters het agterkwarte van hoender tot bykanse perfeksie gebraai en dit saam met broekaartappels, broodjies en ’n ordentlike mengelslaai voorgesit. Ek is nie seker of dié braaihoender op die spyskaart is nie, maar as dit nie is nie, behoort dit te wees. Kaartjies vir die kuier- en eetmiddag is teen net R100 verkoop.

As jy meer oor die kosmark, die kuier-en-klets op Vrydae of oor Rafters wil weet, bel vir Gert van der Walt by 083-302-1076.


Ponieritte en ?n reuse speelraam hou die kleingoed besig op Rafters se kosmark. Genoeg veilige parkeerplek is beskikbaar

 

© 2019 Die/The Bronberger