Silver Lakes se Michelle bring haar Afrikaanse debuut-album uit Print E-mail
News - Ons Mense
Saturday, 18 July 2009 01:34
Untitled Document

Silver Lakes se Michelle van Staden het onlangs haar Afrikaanse debuut-album uitgebring. Sy het begin naam maak met optredes wat strek van ’n musiekblyspel en opera tot kontemporêre gala geleenthede, huldeblyke en as lid van die Fantastic 4. Lesers sal haar dalk herken as Estie, die klein rolletjie wat sy verlede jaar in 7de Laan gespeel het om die stomme Marko te verlei.


Michelle van Staden

‘Met die Tyd’ is die naam van Michelle van Staden se Afrikaanse debuut-album. Dié album is ’n versameling verwerkings van Afrikaanse luistermusiek van twee of drie dekades gelede wat deur die Maroela musiekspan opgetof is.

Die liedjies wat Michelle uitgesoek het was dit waarna haar gesin altyd geluister het as hulle op vakansie gegaan het. “Ek was nog baie klein, maar het altyd geweet dat ek eendag hierdie liedjies self gaan opneem,” sê Michelle.

Die liedjies waarna Michelle verwys is ou Afrikaanse goues soos ‘Ek lewe’, ‘Groen koringlande’, en ‘Ek verlang na jou’. Die album bevat ook twee van Michelle se eie liedjies, ‘Vir ’n Wyle’ en die titelsnit ‘Met die tyd’.

Michelle het ‘Met die tyd’ vir haar ouma geskryf wat in 1994 aan kanker oorlede is en sy sê sy weet sommer dat haar ouma dit hoor en weet dat dit vir haar bedoel is. “In my lewe was ek nog nooit so trots op ’n voltooide projek soos op dié een nie,” sê Michelle wat in Oktober 2006 haar Engelse debuutalbum, ‘To be real’, uitgebring het.

Dié album het die elemente van klassieke en ligte musiek gekombineer met inspirasie van kunstenaars soos Sarah Brightmann en Josh Groban. Dit sluit verwerkings in van die bekende ‘Take my breath away’, ‘Over the rainbow’, en ‘One day I’ll fly away’.

Michelle, as die karakter Estie, verlei vir Marko in 7de Laan

Moeilik
Volgens Michelle is dit glad nie maklik om jou voet in die deur te kry in die musiekbedryf nie. Sy sê dat al het jy al die talent op aarde en gelaatstrekke soos Brad Pitt of Angelina Jolie, sal dit jou nerens bring sonder harde werk nie. “Hare op die tande, uithou- en aanhouvermoë en natuurlik ’n betreklike dik vel mag moontlik ’n ou gelukkie na jou kant toe bring,” sê sy.

En natuurlik help haar ouers se ondersteuning. Michelle en haar ouers bly in Silver Lakes en sy sê dat hulle gesin baie familie-vas is en goed oor die weg kom. Sy het ’n jonger sus, Carike, wat in Johannesburg woon en ’n jonger boet, Dewald, wat saam met sy vrou, Amanda, gaan nesskrop het. Michelle sê haar ma is haar beste vriendin en wanneer sy nie klasdraf nie, “klim ons in die motor en ry Pretoria plat opsoek na mooi goedjies vir ons en die huis. Dis my gunsteling tydverdryf; om saam my ma in die Jakarandastad rond te rits.”


Michelle saam met Pieter Koen, Danie Niehaus en Irene van Wyk as die Fantastic 4

Passie
Michelle studeer joernalistiek by Tuks, waar sy ook haar B.Mus. graad, Uitvoerende Kuns, voltooi het. Sy sê dat sy haar passie vir musiek en die kunste ontdek het toe sy op laer- en hoërskool deelgeneem het aan operettes, revues en konserte. Reeds op die ouderdom van 16, het sy besluit om haarself toe te spits op ’n sangloopbaan en het begin met formele sangopleiding.

Sy is in 2001 Tuks toe waar sy meestersklasse geloop het by bekende kunstenaars, soos Mimi Coertse, Kobie van Rensburg, Svein Bjørkøy, Cladio Danuse en Szusa Alföndi. Sy het ook sangonderrig van Ina Snyman en Prof Werner Nel ontvang. In 2003 het sy die rol van Bastienne in die Mozart-opera ‘Bastien und Bastienne’ gesing onder leiding van Prof Eric Rycroft met regie deur Mimi Coertse. In 2004 het Michelle die rol van Pamina in die Mozartopera, ‘Der Zauberflöte’, gesing, weer onder leiding van Prof Eric Rycroft met regie deur Dr Mart Munrou.

In haar studiejare het Michelle ook die geleentheid gekry om die verhoog te deel met ligtemusiek kunstenaars soos Dewald van Solms, Hanelli Stapela, Liz Lombaardt en André Schwartz.


Michelle in die rol van Bastienne in die opera ?Bastien und Bastienne? met regie deur Mimi Coertse

Optredes
Ná sy haar graad verwerf het, sit Michelle in 2005 vyf maande eenkant om die rol van ’n non te vertolk in die musiekblyspel, ‘The Sound of Music’, wat by die Staatsteater en Sandt du Plessis se ouditoriums op die planke gebring is. Michelle was in 2007, saam met Pieter Koen, Danie Niehaus en Irene van Wyk, lid van die Music Profileproduksie, ‘Fantastic 4’, wat Suid- Afrika en omliggende lande plat getoer het.

Dit was ook die jaar waar sy deelgeneem het aan die ‘6de Afrikaanse Klipdrif Musiekfees’ en in duet opgetree het saam met Gerrie Pretorius by Carnival City in ‘Ek sing vir jou Bles’.

Michelle was deel van die vertoning, ‘Legends of the Sun’, ’n huldeblyk aan sterre van gister soos Koos du Plessis, Kris Kristofferson, Anneli van Rooyen, Elvis, Andrew Lloyd Webber en Sias Reynecke.


Michelle se Afrikaanse debuut-album, ?Met die tyd?

Bronberg
Tussen studies en optredes, maak Michelle gereeld tyd om in die Bronberg- omgewing te kuier. “My gunsteling uithangplekke in die Bronberg is Tuscany’s waar ek myself kort-kort amper dood eet, die roosplaas Soleil / Ludwig’s Cut Roses en dan al die pragtige kwekerye langs Lynnwoodweg.”

Sy geniet dit om by ’n mooi troue by Farm Inn vir die bruidspaar te sing en om by funksies in Silver Lakes se klubhuis op te tree. En natuurlik, sê Michelle, is sy mal oor ons kontrei se eie tydskrif.

“Sodra my pa Die Bronberger op ons koffietafel neersit, blaai ek vinnig eerste na ‘Toeka se dae’. Ou dinge fassineer my. Het nog altyd. Selfs my klerekas dateer uit vorige era’s en ek probeer altyd iets nuuts met iets ouds kombineer. Dit hou die lewe interessant.”

 

© 2020 Die/The Bronberger