Vreethans van Heerden en Metgesel besoek kuierplekke in die Bronberg-gebied ongenooid en betaal self vir dit wat hulle geniet, of dalk nie geniet nie

Die heel belangrikste ete van die dag, het my oorle ma altyd gesê, is ontbyt. En vir my is ’n ordentlike ontbyt ook seker die heel lekkerste ete van die dag – behalwe miskien vir ’n goeie middagete, of dalk ’n aandete. Maar hoe dit ook al sy, dis vir brekfis wat ons een onlangse Saterdag afsit na De Haven Oost toe en na een van die aangenaamste eet- en vroegdag kuierverrassings in ’n lang tyd toe.

Die ingang na de Haven Oost

De Haven Oost is ’n plotplek neffens die ou Bronkhorstspruitpad, vlak waar dit die Rayton/Cullinanpad kruis. Dis ’n familiesaak wat duidelik met groot ywer, liefde en toewyding deur ’n familie met goeie smaak en ’n fyn gevoel vir detail saamgesit is.

Dit spog met ’n onthaalplek (‘venue’ is blykbaar nou aanvaarbare Afrikaans), oornagplek, ’n spa (wat sou die Ingelse woord tog nou daarvoor wees?), ’n troukapel, ’n stylvolle restourant en ’n kroeg, ’n kwekery en ’n uitgebreide familie vol plattelandse gasvryheid en met verdere planne vir dinge soos ’n diereplaas, ’n kinderhemel en nog wat.

Die oornagplekke is aards, dog luuks

Maar dis vir ontbyt wat ons op dié sonnige Saterdagoggend opdaag. Nogal gebespreek en als het ons, soos wat hulle vra in hulle Bronberger- advertensie. Met die indraaislag deur die indrukwekkende bliktoringingang dag ek dadelik ek verstaan nou die besprekingsversoek. Want dit lyk soos nagmaal op Deelkraal soos die baie bakkies en paar karre geparkeer staan. Maar dit blyk toe dat daar juis dié oggend ’n boerevergadering in die venue is.

Dit is vir my dadelik opvallend dat boerevergaderings in ’n paar opsigte nogal kwaai verander het sedert ek laas gekyk het. Boere dra nie meer kakieklere en hoedens nie. Nee, dis nou denimbroeke, bofbalkepse en windjakkers. En, glo dit as jy wil, baie van die boere het hulle vrouens saamgebring. Voor jy nou op jou perdjie vlieg, mevrou, ek dink dis nogal ’n rein verandering. Die vrou-saambring, bedoel ek nou. Buitendien, gemeet aan Metgesel se reaksie, is De Haven Oost ’n plek waarheen ’n vrou graag saamgebring wil wees.

Gerieflik en oorspronklik

O ja, die ontbyt. Dogter ontvang ons en wys ons op drie opsies van waar ons kan plaasneem om vir die brekfis te loop aansit. Dis lekker sonnig buite, maar ’n gawe boervrou wat saam met ’n groepie daar sit en boeretroos nuttig, waarsku dat die betonbankies nog ongemaklik koud is ná die winternag. Ons kies die baie gerieflike binnevertrek met die mooi oudhede en diep rusbanke en interessante ou foto’s teen die mure. Effe te vroeg, dink ek, om in die ruim eetvertrek neffens die kroeg te gaan sit.

Ons kry die dik en kunstige spyskaarte saam met ryk en lekker koffie in billike stomende bekers en ons lees en ons lees, want daar is baie om te lees en om oor te wonder en om oor te besluit. Soos daar met die uitleg, bou, meubilering en dekor van die plek duidelik diep en oorspronklike dinkwerk deur die familie ingesit is, is dit ook met die spyse op die kaart gedoen. Alles wat jy vir ontbyt sou verwag is daar, maar dit is deurvleg met ’n oorspronklike andersgeit.

Die kroeg en binne kuierplek

Ontbytgeregte soos ’n plaatkoekietoring met gegeurde maalvleis, eier en spek, kaas en nog, teen R35, of ’n gevulde skon met roereier, spek en bedek met ’n roomkaassous bedien saam met ’n groen slaai, vir ’n skamele R25, trek my aandag. ’n Wye keuse van vulsels vir ’n R28 se omelet, ’n allemintige allegaartjie met ’n papsambaal wat hulle “Die ou grote” noem en ’n gesondheidsontbyt is onder meer beskikbaar.

Metgesel besluit op die kleiner weergawe van ‘die ou grote’, spesiaal vir dames, en die papsambaal wat daarmee saamkom het haar gaande. Sy dink ook dis ’n baie goeie plan om tjips saam met brekfis te bedien. Seun, Neville, is die sjef en hy het voor die bestelling vriendelik ’n paar dinge oor die geregte kom verduidelik. Langs die pad het ons ook met ma, pa, ouma, tannie en nog gawe De-Haven-Oostfamilielede kennis gemaak.

Pannetjie-ontbyt

Die ontbyt wat ek geniet het, noem hulle ’n pannetjie-ontbyt. Onder in die pannetjie is ’n baie smaaklike sheba van tamatie en ui. Dis gelaai met ’n goeie boerewors wat net reg en nie doodgebraai is nie, spek (bacon in Afrikaans) wat bros gebraai is en twee perfekte gebakte eiers. Jy kry genoeg roosterbrood, gerasperde kaas en konfyt daarby. Ons keuses kos R35 elk.

Jy kan op Sondae ’n potjiekos buffet teen net R85 by De Haven Oost geniet en – o, gaats daar raak my toegelate ruimte op. Bel hulle by 012-736-2246, en gaan kyk self. Jy sal nie spyt wees nie.