Ons smul volksvreemd op ?n Sondag PDF Print E-mail
News - Vreethans
Monday, 22 June 2009 16:05
Untitled Document

Vreethans van Heerden en Metgesel besoek kuierplekke in die Bronberg-gebied ongenooid en betaal self vir dit wat hulle geniet, of dalk nie geniet nie

Vir volksvreemde kosse is ek nie bang nie, maar vir Indiese geregte was ek nog altyd matig versigtig. Dit roep altyd daai prentjie van die ou met bloedbelope pieringoë en ’n vlamskietende tong by my op.

Maar ek hou my lyf dapper toe Metgesel meen Indiese kos is net die ding om ’n nat, koue Sondag mee op te kikker en ons sit af na die Hazeldean winkelsentrum se Tranna toe.

Tranna is die naam van die Pakistanse volkslied, verneem ons later by die gawe kelner. Die eienaar is ’n Pakistanie, sê gawe kelner, maar die kos by Tranna is Noord-Indies, waar die sjef vandaan kom. Van Punjab af, om presies te wees, verduidelik hy.


Tranna is by die Hazeldean winkelsentrum

Die binnewerke van Tranna is klein en intiem. Net ’n paar tafeltjies en ’n kroegie en vandag ook ’n lang tafel waar die Sondagse buffet uitgestal staan. Want Sondag is buffet-dag by Tranna, maar jy kan ook van die baie uitgebreide spyskaart af bestel. Die buiteplek is egter ruim en gerieflik en vandag is die stoep met plastiese mure toegespan teen die koue. Ons kry ons sit op die stoep en bestel die nodige om die kleintongetjie soepel te hou, terwyl ons die spyskaart bestudeer.

Dit bied leesstof wat jou nogal lank besig kan hou Jy kan byvoorbeeld kies uit 15 vegetariese disse, tien soorte brijani, elf hoendergeregte en net soveel van lam, tien broodsoorte van Indiese oorsprong, ’n rits voorgeregte wat kebabs en samoesas insluit, seekos en platters en nog alles wat ek vergeet het.

Die Sondag-buffet is vandag eintlik die logiese keuse en sekerlik die beste waarde vir geld wat ek in ’n baie lang tyd raakgeloop het. Vir R65 kry jy ’n keuse van voorgeregte soos samoesas, kebabs en chillibites. En dan kan jy hoenderkerrie, lamkerrie, hoender masala, hoender korma of een van twee groentegeregte kies, of natuurlik ’n ietsie van elk, sou jy wou.

Alles kom saam met basmatiese rys en een van daai wonderlike, groot, plat Indiese brode en alles is natuurlik goed gekerrie en gekrui. Gawe kelner vertel ons dat al die buffetgeregte matig (mild) is. O ja, natuurlik is daar ook nagereg; ryspoeding of/en roomys.


Ek het met die sitslag die prys van ?n glas rooiwyn gemeet teen die prys van ?n bottel en besluit op ?n bottel. Dit was egter voor ek Tranna se reuse-wynglase gesien het.

As jy van die spyskaart af bestel, kan jy kies tussen matig, medium en sterk. Omdat Metgesel die buffetding doen, kies ek ’n medium lam korma van die spyskaart af.

Dit is gedoen in ’n hemelse, ryk kasjoeneut-en-roomsous. Die vleis is van ’n goeie gehalte en murgsag. Die ‘medium’ byt raak, maar nie te seer nie. Net reg vir ’n koue dag, eintlik. Die ligte, los basmatiese rys komplimenteer die korma-lam mooi, maar dis die Roti-brood saam met daai kasjoeneutsous wat my trommel naderhand dik agter die lekker aan laat raak.

My keuse kos R75 en ek sou op enige ander dag gedink het dis baie billik, as dit nou nie was vir die feesmaal wat Metgesel van die buffet- tafel af geniet nie. Sy probeer ’n bietjie van alles en dalk ’n bietjie te veel van party, maar lekkerder, sê sy, het sy lanklaas op ’n Sondag of op enige ander dag geëet. Ek help haar om haar ryspoeding baas te raak en besluit om volgende keer my stouter skoene aan te trek en te gaan vir die ekstra-sterk.

 

© 2019 Die/The Bronberger