Bronbergers blink uit met Arabiere op kampioenskappe Print E-mail
News - Ons Mense
Monday, 22 June 2009 18:02
Untitled Document

Bronbergse Arabierperdtelers het ’n weghol sukses gehad in die Nasionale Arabierperd Kampioenskappe vir 2009. Dié kampioenskappe is van 28 April tot 2 Mei by die Afridome in Parys, Vrystaat gehou.

Deelnemers van oor die hele land asook telers vanaf Namibia het aan die skouspel deelgeneem. ’n Handjievol telers van die Bronberg-omgewing het hul saals, tooms en perde gepak en die strawwe kompetisie op nasionale vlak gaan aandurf.


Die SA Nasionale Kampioen Ope Ryperdklas is gewen deur Chris Hartman op El Jamani Zalique vir die Bronbergse El Samar Arabier stoetery

El-Passo
El-Passo stalle van plot 39, Zwavelpoort, spog met hul kinderruiter, Tamryn Kruger, wat twee eerste plekke, twee tweede plekke en ’n vierde plek in die verskeie ryklasse verower het. Na afloop van die skou is Tamryn bekroon met die Kinder Victor Ludorum vir stap en draf. Rayno van Reenen met sy skouhings, Tehama Thee Saracen, van dieselfde stalle het ’n totaal van vyf eerste plekke verower in die skou en in die kampioenskappe die volgende verower:

SA Nasionale Kampioen Kinder/Junior Ryperd 2009, SA Nasionale Reserwe Kampioen Skou Ryperd 2009, SA Nasionale Reserwe Kampioen Ruiter 2009, SA Nasionale Kampioen Skoujag Plesier Ryperd – vierde in die top vyf, en SA Nasionale Kampioen Ope Ryperd - vyfde in die top vyf.

Dewald Malan het ’n sesde plek verower in die Veterane Ruiterafdeling en Laura Archer het ’n vyfde plek verower in die Volwasse Ruiter-afdeling en ’n tweede plek in die Nuweling Ryperd-afdeling.


Sansia Brink van El Samar het die SA Nasionale Kampioen Skoujag Plesierperd gewen op El Jamani Silvern Rashah

Shiraz
Johan van Rensburg van Shiraz Arabiere, plot 36, Zwavelpoort, het die Junior Engelse Plesier Tuigperdafdeling gewen waarna hy in die kampioenskappe bekroon is as Suid Afrikaanse Nasionale Engelse Plesier Tuigperd Kampioen met hul jong ingevoerde hings, Appalanation. Die skouhings, Om El Shah Dream, het vir eienaar Viva Durno ’n wen in die Senior Hingste In-Hand Kampioenskap en ’n reserwe plek in die Senior Hingste In-Hand Kampioenskap besorg. Hennie van Reenen het hom geskou.


Rayno van Reenen met sy skouhings, Tehama Thee Saracen, van El-Passo stalle het vyf eerste plekke verower

El Samar
Sansia Brink van El Samar Arabiere, Zwavelpoort is bekroon as SA Nasionale Kampioen Skoujag Plesierperd op die perd Jamani Silvern Rashah. Chris Hartman van dieselfde stoet het die perd El-Jamani Zalique gery en was die Reserwe Kampioen Skou Ryperd en SA Nasionale Kampioen Ruiter. Hulle dogter, Marisa Brink, het ook haar klas, Kinderruiter, gewen.

Carol-Ann Paterson het met El Samar se hings, El Jamani Silvern Quatro, ook baie goed gedoen. Sy het die Veterane Ruiter-afdeling gewen en in haar ander klasse goed presteer met dié jong perd. Ons kontrei se Arabierperdtelers sê dat hulle baie trots is op al hul Bronbergse ruiters. Hulle harde werk word weerspieël in die uitslae.


El-Passo se Tamryn Kruger, op Elsabad Nikita, is bekroon met die Kinder Victor Ludorum vir stap en draf

Marisa Brink van El Samar het die kinderafdeling van die Arabierperd Skoujag Plesier Ryperd en die kinders se kostuumafdeling van die Arabierperd Nasionale Kampioenskappe gewen op Jamani Silvern Rasha

 

 

© 2020 Die/The Bronberger