Die Bronnie kry sporadies versoeke, klagtes en selfs bykanse bitsige briewe (soos die een hiernaas) oor te min van ons redaksionele inhoud in Engels gepubliseer word. Ons ontvang selfs versoeke dat die totale inhoud van Die Bronberger Engels moet wees. ‘Dan kan almal dit mos lees,’ is die redenasie.

Ons wil dit graag duidelik stel dat ons niks teen die mense in ons verspreidingsgebied het wat net Engels kan lees en verstaan nie. As dit enigsins haalbaar was, sou ons dit kon oorweeg om ‘n aparte Bronnie met net Engels as inhoud uit te gee. Maar dit is nie.

Onafhanklik
As onafhanklike publikasie kon ons met die geboorte van die Bronnie in September 2002 die besluit neem om grotendeels die taal van die (baie groot) meerderheid van ons lesers te gebruik. Ons kon besluit wie ons teikenmark sou wees, en ons hou daarby. In die proses is ons trots om te kan bydra om hierdie mooi taal in die land van sy oorsprong te help lewendig hou.

Ons weet dat die oorgrote meerderheid van ons Engelssprekende lesers ook Afrikaans kan lees en vermoed dat al ons Afrikaanssprekende lesers die Engelstalige rubrieke en artikels in die Bronnie lees en verstaan.

Goedbedoelde raad
Ons goedbedoelde raad aan dié inwoners van die gebied wat geensins Afrikaans magtig is nie, is om die redaksionele inhoud waarin hulle sou belangstel op ons webblad op te soek en dan vir ‘Google Translate’ te vra om dit in enige taal van hulle keuse te vertaal.

Die Bronberger poog sedert sy ontstaan om met en oor die mense van sy verspreidingsgebied te praat. Dié gebied dek veral die oostelike voorstede van Pretoria, van waar die Bronberg begin, en die landelike gebied en dorpies wat ten ooste daarvan lê. ‘n Gebied waar by verre die meeste mense wat lees, Afrikaans verstaan.

Goggas
Partypolitiek, pornografie, haatspraak en ander ongewenste goggas sal nie ‘n vastrapplek in hierdie gemeenskapstydskrif kry nie. Nie terwyl ons die voorreg het om sy uitgewers te wees nie.

Ons fokus bly op die landelike leefwyse en op die doen en late van die gemeenskap van ons kontrei en dit waarin hulle belangstelling lê. Ons bly verbind tot die bewaring van die ryk natuurskat in ons omgewing en tot die veiligheid en voorspoed van ons mense. En ons bly daartoe verbind om grootliks Afrikaans as voertaal te behou.