Klein vliegie bied groot oplossing PDF Print E-mail
News - Ons Omgewing
Monday, 25 June 2018 10:29
Untitled Document

‘n Klein vliegie van oorsee bied ‘n groot oplossing in die beheer van een van ons gebied se hardnekkigste indringerplante. Swartwattel word deur die galvlieg, wat soos die boom inheems is aan Australië en Tasmanië, beveg.

Lesley Henderson, ’n wetenskaplike wat in onkruid spesialiseer as deel van die plantbeskermingsnavorsingspan by die Suid-Afrikaanse Nasionale Biodiversiteit Instituut (SANBI), sê dat daar uiteindelik hoop is om die verspreiding van swartwattel, Acacia mearnsii, hok te slaan.


Swartwattels vorm nie meer dié saadpeule as die galvlieë daar doenig was nie
Foto: Lesley Henderson

’n Navorsingsprojek tussen die Landbounavorsingsraad en die Dierkunde Departement by die Universiteit van Kaapstad het in 2006 ’n populasie van dié galvlieë, Dasineura rubiformis, in die Wes-Kaap daargestel. Vandag is sulke groepe galvlieë na plekke regoor die land versprei.

Die insekte veroorsaak ’n irritasie in die blomme, wat beteken dat hulle nie saadpeule vorm nie. Die afname in saad veroorsaak nie dadelik die boom se uitwissing nie, maar dit beperk dié indringer se verspreiding.


Die galvlieë veroorsaak ’n irritasie in die blomme
Foto: Lesley Henderson

Die irritasie beskadig nie die res van die boom nie, wat beteken dat die ekonomiese voordele van die boom behoue bly, terwyl hy nie meer ‘n gebied oorneem nie.

Die swartwattel word grootliks gebruik om leer te looi, vir houtskaafsels en vuurmaakhout. Dié boom kan tot 15 meter hoog word en is doringloos met varingagtige, neerhangende takke. Die blare is saamgestel en dubbelveervormig met baie klein blaartjies. Die blomhofies is liggeel en verskyn van Augustus tot November in saamgestelde trosse. Die sade is peulvormig en afgeplat.


‘n Swartwattel in blom

Vir meer inligting bel Lesley Henderson by 012-8435035 of stuur ‘n e-pos: This e-mail address is being protected from spambots. You need JavaScript enabled to view it

 

© 2018 Die/The Bronberger