Alle kunstenaars droom van
Parys. Min kry die kans om dié
stad te besoek, wat nog te sê
daar te werk. Dink jou nou net in
hoe dit moet voel as jy gekies word
om vir vier maande in ’n ateljeewoonstel
in dié kunstenaarstad te
gaan woon en werk.
Johan Marais van Woodlands was
die kunstenaar wat deur die Suid-
Afrikaanse Vereniging vir Visuele
Kuns gekies is om van September
tot Desember 2006 in ’n woonstel in
die Cité International Des Arts kompleks
in Parys te woon.
In Mei vanjaar hou Johan sy sewende
solo uitstalling by die Pretoriase
Kunsvereniging en dink terug aan
die tyd toe hy vir die eerste keer in
Parys uitgestal het sonder om ’n
enkele skildery te verkoop.
Johan Marais verduidelik wat
skilder vir hom beteken
Land
Johan vertel dat hy op Maandag
4 September 2006 in Parys aangekom
het, dadelik uitgepak het, die
nodige kruideniersware gaan koop
het en toe vir ’n lang wandeling
gegaan het. Teen die einde van
daardie dag het hy klaar besluit dat
hy sy werk gaan fokus op landskappe,
spesifiek die parke en woude in
en om Parys en suidelike Frankryk.
Hy het sy eerste skildery daardie
selfde aand begin.
Johan sê hy is oortuig daarvan dat
daar iets in Parys se drinkwater is
wat ’n mens vrolik en entoesiasties
maak. Of dalk was die euforie te
danke aan die bekostigbaarheid van
die Franse wyn, spot hy.
Reeds op sy tweede dag in Parys
het hy ’n plek bespreek vir ’n uitstalling
van 6 tot 16 Desember. Sy
doel was om 40 skilderye klaar te
maak wat werke in akriel op doek,
asook pen en ink sketse op papier
sou insluit.
?Swaziland Blue Gums? kan by Johan se uitstalling van naderby bekyk word
Eie
Hy het ure in museums spandeer
om ou meesters se werk te bestudeer,
net om te besluit dat dit dalk
belangriker sou wees om sy eie
benadering te volg. “In Parys is jy op
jou eie,” sê hy. “Jy doen jou eie
navorsing, werk alleen en ondervind
kuns alleen.”
Tog was daar kunstenaars om hom
te help met die kommunikasie-probleem
wat hy ondervind het omdat
hy nie vlot Frans kon praat nie. Nog
iets wat hom gehelp het was sy
daaglikse ‘landskap meditasie’ op
die banke van die Seine of in die
parke van die stad.
Johan sê dat die sukses van ’n landskap
skildery afhang van die vermoë
om ’n mens se inspirasie oor te dra
op doek sodat dié wat na die skildery
kyk kan voel hoe dit is ‘om daar
te wees’.
Vir hom is skilder nie ’n blote weergee
van feite nie; dit grawe diep in
die kunstenaar se siel in en is ’n uitdrukking
van sy menslikheid. Of dit
die moeite werd is om sekere onderwerpe
te skilder, is iets wat Johan
homself gereeld afgevra het met sy
verblyf in Parys. Veral nadat hy
negatiewe kritiek ontvang het. Die
350 ateljees in die Cité was vol
kunstenaars van dwarsoor die
wêreld, elk met sy eie opinie oor
Johan se werk.
?Grief, Sorrow but Hope? is die
skildery wat in 2007 gekies is om
uitgestal te word by die Salon
D?Automne in Parys
Kritiek
Net voor sy uitstalling het Johan ’n
klomp van dié kunstenaars na sy
ateljee genooi om na sy werk te kyk.
Dit was miskien nie ’n goeie idee
nie, maar hy het geglo dat hy iets uit
hulle opinies kon leer. Wat hy op die
ou einde geleer het is dat hy bowenal
aan homself as skilder getrou
moet bly, ondanks ander se opinies.
Dit was nie altyd maklik nie, veral na
die bittere teleurstelling toe hy nie
’n enkele skildery verkoop het met
sy 10-dag uitstalling nie.
Johan sê dat sy ondervindings in
Parys hom gebring het waar hy vandag
is. Dit is daar waar Johan vir die
eerste keer in sy lewe in staat was
om in sy ateljee te skilder sonder
enige inmenging. Op ’n reënerige
dag kon hy tot 12 ure lank skilder.
Een van die skilderye wat Johan in Parys gedoen het -
die tuine van die paleis van Luxembourg
Voltyds
Johan het eers toe hy in 2005 afgetree
het, ’n voltydse kunstenaar
geword. Hy is in Kimberley gebore
en het sy eerste kunslesse aan die
Diamantveld Hoërskool gehad. Na
matriek het hy kuns buitemuurs
studeer en ook sy B.Com graad aan
die Universiteit van Suid-Afrika voltooi.
Oor die jare het hy verdere kunsklasse
bygewoon en homself nie net
tot een medium beperk nie. Vandag
fokus hy op stillewes en landskappe
en sy voorkeur is om helder, vars
kleure te gebruik wat ’n impressionistiese
gevoel aan die werk gee. Hy
sê dat mense kleur in hul lewens
nodig het, veral as alles rondom
hulle so vaal lyk.
Wat hy bowenal wil hê is dat sy
werk duidelik moet uitstaan van die
werk van ander hedendaagse
kunstenaars, maak nie saak hoe
goed of sleg sy werk is nie. Johan se
doel is om uitdrukking te gee aan
wie hy is en hoe hy die wêreld rondom
hom sien.
As ’n kunstenaar is hy in die vermaaklikheidsbedryf
en wil hy aandag
trek. Johan sê hy wil hê dat sy
skildery mense wat in ’n galery of
museum instap, waar daar hordes
kunswerke is, se aandag lank genoeg
moet trek sodat hulle daarop
reageer. En dit kan maar ’n goeie of
’n slegte reaksie wees.
‘Sunset at the Lake’ is te siene by Johan se uitstalling in Mei
Gekies
Dit lyk egter asof die reaksie op sy
werk oorweldigend goed is. In 2004
en 2005 is
Johan se
werk gekies
vir die Alette
Wessels
Kunskamer
jaarlikse kunsinisiatief.
In
2004 was hy
een van die
finaliste vir
die Johannesburgse
Kunsstad
kompetisie.
Sy werk is
ook gekies vir
die Alice
Kunsgalery se
‘Vars Talent
2006’. Een van sy skilderye verskyn
in een van die 2007 Parmalatadvertensies
en sy werk word uitgestal
in verskeie kunsgalerye in
Suid-Afrika.
Johan het in 20 groepuitstallings en
ses solo-uitstallings in Suid-Afrika
deelgeneem. Hy het ook al in
Oostenryk uitgestal. Na sy 2006
Parys-uitstalling is sy werk, ‘Grief,
Sorrow but Hope’ gekies om in
November 2007 uitgestal te word by
die Salon d’ Automne in Parys.
Hy het opdrag van Absa Bank ontvang
om 13 landskappe vir dié bank
se top presteerders te skilder. ’n
Ander opdrag was om 20 skildery vir
’n gastehuis in Pretoria te skilder en
sy werk verskyn gereeld in tydskrifte,
kunsboeke en koerante.
Johan se sewende solo uitstalling is
van 10 tot 28 Mei by die Pretoriase
Kunsvereniging, Mackiestraat 173,
Nieuw Muckleneuk. Galery-ure is
van Dinsdag tot Vrydag van 9.30 vm
tot 5.30 nm en op Saterdae van
9.30 vm tot 1 nm. Die uitstalling
word op 10 Mei om 6 nm geopen.
Johan se werk word in talle galerye
uitgestal
|
