Mezzo-sopraan word 99 jaar oud Print E-mail
News - Ons Mense
Monday, 20 April 2009 12:01
Untitled Document

Tant Annetjie Coetzee het onlangs 99 jaar oud geword. Sy het haar verjaarsdag saam met ongeveer 20 van haar ou en nuwe vriende in haar kamer by die sorgeenheid op Kleinfontein gevier.

Die mense het beurte gemaak om by haar in die kamer te gaan gesels omdat almal nie gelyk kon inpas nie. Annetjie het verlede jaar nog met haar rolstoel sitkamer toe gery vir haar verjaarsdagpartytjie.

Haar dogter, Mieka Erasmus, sê hulle hoop om volgende jaar tant Annetjie se honderdste verjaarsdag te vier, maar dat haar ma nou merkbaar verswak. “Ook die hede en verlede se herinneringe is nie meer so helder onderskeibaar as voorheen nie,” sê sy.

Tog sing tant Annetjie soms nog en is nootvas en helder van klank. In Die Bronberger van Februarie 2007 het ons berig dat Tant Annetjie toe reeds die oudste inwoner in die sorgsentrum van Kleinfontein was, maar steeds sonder ’n bril lees, haar eie tande het en dat haar geheue besonder goed was.

Anna Maria du Plessis is op 30 Januarie 1910 in Rustenburg gebore. Sy is getroud met Nicohlaas Abraham Coetzee en hulle het twee dogters, Emmerenske Margaretha (Mieke) en Francoise Christien (Franni).

Tant Annetjie het van jongs af belanggestel in musiek en is na matriek Stellenbosch toe waar sy lisensiaat-sertifikate in klavier en sang ontvang het. Sy het ’n mezzosopraanstem gehad en het ook in die orkes van die akademie as tjellospeler opgetree. Na haar huwelik het sy sang en musieklesse gegee, insluitende private lesse en klasse by die Rustenburgse Hoërskool en later by die Afrikaans Hoër Seunskool.

Sy het ook ’n diploma in toneelspel verwerf. Annetjie het graag met haar hande gewerk en kunsklasse geneem. Sy kon skilder, hekel, hoede maak, emalje-, pottebakkers-en houtsneewerk doen. Van haar werk is opgeneem in die Nasionale Kultuurhistoriese Museum in Skinnerstraat.


Annetjie Coetzee met haar 99ste verjaarsdag

 
Besoek die Suid-Afrikaanse Departement van Gesondheid se webwerf vir alle amptelike inligting en opdaterings rakende COVID-19 by www.SAcoronavirus.co.za

© 2020 Die/The Bronberger