Ons groet Zwavelpoort se organiese boerin Print E-mail
News - Ons Mense
Monday, 23 February 2009 20:27
Untitled Document

Marguerite Alant van Zwavelpoort is op 21 Januarie in die ouderdom van 70 jaar na ’n lang siekbed oorlede.


Marguerite Alant, soos sy daagliks onder haar sambreel by haar organiese skaapboerdery rondgeloop het

Zwavelpoorters Marguerite en Albert Alant het vir jare Alant Motors besit. Toentertyd was dit ’n landmerk in Garstfonteinweg. Marguerite is in Tanganjika gebore en is ’n direkte nasaat van ontdekkingsreisiger Carolus Trichardt, seun van die Voortrekker Louis Trichardt.

Lesers het Marguerite leer ken toe haar organiese Ille de France skaapboerdery in Zwavelpoort die fokus van ’n Julie 2003 artikel in Die Bronberger was. Ons het vertel hoe sy haar skape se voer self aanplant en die grond deeglik vir dié aanplanting voorberei met ’n goeie 300 ton mis en 30 ton kalk.

Daar is geen kunsmis op dié plot gebruik nie en ook geen voer-wat-uit-‘n-sak-uitkom nie. Dit is nou behalwe vir die babala en molasses mengsel wat sy met ’n ou stofsuier vakuum verpak het en in rotbestande ou reënwatertenks geberg het.


Marguerite se laaste oes staan pragtig geil op haar Zwavelpoortplot

Sy het self die smeerwortel (comfrey), groente, bolle, lusern en alles wat sy vir haar skape gevoer het, aangeplant.

Op dié plot het alle afval kompos geword en selfs die leë bokse is verbrand sodat die as teruggewerk kon word in die lande. Marguerite se seun Carl en skoondogter Helen woon nou op dié plot.

 
Besoek die Suid-Afrikaanse Departement van Gesondheid se webwerf vir alle amptelike inligting en opdaterings rakende COVID-19 by www.SAcoronavirus.co.za

© 2020 Die/The Bronberger