PDF Print E-mail
News - Ons Omgewing
Tuesday, 27 January 2009 01:10
Untitled Document

Ontmoet die Bronbergse voël wat in verhouding met sy lyf die langste pote in die wêreld het. Die rooipootelsie se Engelse naam, ‘black-winged stilt’, verwys juis na die stelte waarop dié outjie in die water rondloop.

Hy is ’n groot swart-en-wit waadvoël van ongeveer 38 cm lank met baie lang, rooi-pienk bene en ’n dun, gepunte, swart snawel. In vlug steek die swart ondervlerke af teen die wit onderste dele, en die lang bene strek opvallend agtertoe. Die geslagte lyk eners, maar die swart kan dowwer wees op die wyfie se vlerke. Onvolwassenes het ’n grys agternek, dowwe swart vlerke en grys-pienk bene.


?n Rooipootelsie-kuiken

Die rooipootelsie bly in moerasse, riviermondings, vleie, soutpanne en oorstroomde grond. Hulle broei hoofsaaklik op eilande of opdrifsels in vleie, vlak mere en damme. Die nes is gewoonlik ’n klein holtetjie op oop grond naby water, maar hulle kan ook nes maak op ’n platform drywende waterplantmateriaal.

Hulle verkies om nes te skrop waar hulle ’n goeie 360 grade sig het. Rooipootelsies kan alleen of in kolonies van honderde pare broei. Vier eiers word op ’n keer gelê en hulle vat tussen 24 en 27 dae om uit te broei. Nadat die eiers uitgebroei het, is die kleintjies baie gou onafhanklik van hul ouers.

Dié voëls is luidrugtig in verdediging van hul nes en kleintjies. Hul roep is ’n skril, kort ‘kiek-kiek’ geluid wat hulle veral maak wanneer hul verskrik word.

Hulle vreet hoofsaaklik insekte, akwatiese larwes, paddavissies, viseiers, klein vissies en krappe, maar sal elke nou en dan ook sade vreet.


Rooipootelsie
Foto?s: Wikipedia

Sommige populasies rooipootelsies migreer, maar kolonies in warmer gebiede bly gewoonlik waar hul is of trek net kort entjies in dieselfde omgewing rond.

Die rooipootelsie, Himantopus himantopus, kom voor in die suide en suid-ooste van Europa, Sentraal- Asië, Afrika, Australië, Sentraal- Amerika, Suid-Amerika, Hawaii, die Filippyne, Suid-Sentraal Kanada, en in die weste en suid-ooste van die VSA.

 

© 2019 Die/The Bronberger