Elsabé Maré
Inwoners van Rayton se Quimi Huis, waar intellektueel gestremdes versorg word, het knap voor Kersfees hulle eie Kersverhaal opgevoer.

Ná omtrent een en ’n half jaar van bestaan was Quimi Huis gereed vir dié optrede, bygestaan deur stigter Linda Krause, asook Marie Jacobs en personeellede.

“Ons was nie in ons eerste jaar al gereed om die Kersverhaal aan te pak nie en ons het selfs dié jaar gespook, maar ons is dankbaar vir nog ’n geleentheid wat aan ons inwoners gebied is.

Dankie vir almal se hulp wat dit moontlik gemaak het,” sê Linda. Na ’n tydperk waarin die gemeenskap hulle harte en hande vir dié huis oopgemaak het, het ’n wonderlike bederftyd rondom Kersfees hom daar afgespeel.

Selfs Meneer Pretoria 2008/09, Jaco de Bruyn, se kattebak was vol geskenke wat hy aan ’n waarderende gehoor uitgedeel het.

Met Linda Krause in die agtergrond lees een van die inwoners die Kersverhaal voor terwyl skaapwagters soek na die Christuskind

Geskenke word met vreugde ontvang . .