Elsabé Maré
Die kunstenaarsdorpie Cullinan het op 12 Desember sy eerste kunsvereniging gestig. Prof. Marinus Wiechers, kunskenner en oudhoogleraar in die reg en rektor van Unisa, het die opening waargeneem waar 15 plaaslike kunstenaars uitgestal het. Die uitstalling, wat bestaan uit skilderye, pensketse, beeldhouwerk en pottebakkerskuns, word voorlopig nog in die Aldebran Studio van kunstenaar Marcella de Boom in Stinkwoodstraat, net noord van Oaklaan gehou.

Volgens voorsitter Edith Schmidt, wat die verwelkoming gedoen het, kan alle kunstenaars aansluit. Die konstitusie is reeds in plek, die keurkomitee het bepaalde kriteria waaraan voldoen moet word, en fooie is betrokke.

Edith Schmidt sê daar wag ’n interessante kunsjaar op kunstenaars en die publiek. Dit gaan baie bedrywig wees, want die bestuur moes meet en pas om al die idees per maand in die jaarprogram ingepas te kry.

Prof Wiechers open die verrigtinge met voorsitter Edith Schmidt links van hom
Foto: George Oosthuizen

Die vereniging gaan hom beywer vir opleiding van die publiek in die verskillende kunsvorme en om wenke, deur die keurkomitee, aan die kunstenaars te gee. Almal is welkom: beginners, kunsleerlinge en gevestigde kunstenaars.

Enige driedimensionele kuns kan uitgestal word, ook in ’n kombinasie van die kunsvorme. Omdat daar net ’n sekere ruimte beskikbaar is, sal die keurkomitee die gehalte en hoeveelheid bepaal in ooreenstemming met die bepaalde tema van die uitstalling.

Edith Schmidt en Marcella de Boom in gesellige luim

Die Cullinan Kunsvereniging word gerugsteun deur die Toerisme Raad in die persoon van Kgomotso Lebese en is geaffilieer by die Suid-Afrikaanse Vereniging vir Visuele Kunste (SANAVA).

Die vereniging se eerste funksie was op 17 Januarie toe ’n Rembrandt filmvertoning in The Shed in laer Oaklaan gewys is. ’n Groepuitstalling van portretstudies word vanaf 15 Maart tot 30 April uitgestal.

Vir meer inligting, bel vir Edith by 071-549-5981 of die sekretaresse Benita by 084-840-2831 of stuur ’n e-pos aan: This e-mail address is being protected from spambots. You need JavaScript enabled to view it .