Elsabé Maré
Verlede jaar se petisies het gewerk.’n Nuwe spesiale taakmag is in die Cullinan-omgewing werksaam en gesamentlike SAPS en SANDF optredes is in Desember uitgevoer.

Dié petisies het geëis dat die gemeenskap beter en meer sigbaar gepolisieer word en beter ondersoek na sake by die Cullinanpolisiestasie en omgewing gedoen word.’n Nuwe spesiale taakmag wat in die begin van November tot stand gebring is, het volgens polisiewoordvoerder, kapt. Dennis Adriao, op 3 Desember ’n deurbraak gemaak.

Lede van die taakmag was op die uitkyk vir ’n sindikaat rowers wat moontlik met rooftogte, huisbrake en motorkapings in die omgewing verbind kan word toe lede van die publiek oor verdagte optrede van huurders in die Bougainville Mews Estate in Montana ingebel het. Die taakmag het toegeslaan, drie vermeende rowers gevang en beslag gelê op vyf wapens, kontant en verskeie ander items wat by die Kameeldrif-polisiestasie gehou word. Die publiek word gevra om hulle gesteelde ware te gaan identifiseer.

Op 9 Desember het die SAPS en die SANDF ’n gesamentlike optrede in die gebied uitgevoer. Polisie-offisiere is elke halfuur deur weermaghelikopters in verskillende gebiede op en afgelaai, terwyl daar op drie strategiese plekke padblokkades opgerig is.

Volgens Superintendent Lungelo Dlamini, polisiewoordvoerder tydens die spesiale optredes, was dit gerig op voorkoming van misdaad deur sigbare polisiëring.

Die Minister van Veiligheid en Sekuriteit, Nathi Mthetwa, het Sondag 7 Desember die diens by die Doxa Deo-gemeente in Montana bygewoon en besoek aan van die misdaadslagoffers afgelê. Volgens Louis Meintjies, verteenwoordiger van die Cullinan gemeenskap, word die optredes verwelkom.

Daar is egter nie verdere konkrete optredes nie. Louis sê dat daar kommer is oor doeltreffende koördinasie tussen die groepe wat in die Cullinan omgewing opgetree het. Die Tshwane Metropolisie kon nie by die Cullinanpolisiestasie bevestiging kry waar die kern van die problem in die Cullinan-omgewing is nie.

Om dié rede het die Transvaalse Landbou-unie (TLU) in Desember ’n versoekskrif aan die Minister van Veiligheid en Sekuriteit deurgegee waarin om basiese vereistes van goeie bestuur met die nodige vaardighede in plek, gevra is.

Toe die TLU-kantore in Januarie oopmaak, het die minister kennis gegee dat hulle in gesprek is met die Nasionale Polisiekommissaris. Daarop het die TLU die petisie aan die Nasionale Polisiekommissaris gestuur en wag nou op erkenning van ontvangs.

Louis sê dat goeie bestuur ’n nasionale probleem is, maar dat die gemeenskap die reg het om vir basiese vaardighede te vra.

Ernie Collins, regs, op Hirtentraum en Antonie van Nieuwenhuizen, links, op Radys ondersteun die sigbare polisïeringsinisiatief van die SAPD en patrolleer die paaie van Cullinan, vertel Ernie wat ook die hoof van die berede eenheid by Zonderwater is. Hier is hulle in Zonderwaterweg oppad dorp toe.