Van badkamers en deure PDF Print E-mail
News - Briewe
Monday, 26 January 2009 02:16
Untitled Document

Skaam Verby van Zwavelpoort skryf:
Rona se brief in die September uitgawe van Die Bronberger het my sentimente presies beskryf. Die mode van gastehuise en lodges om deurlose badkamers vir sy gaste te voorsien, is ’n aardige ongewenstheid. Ek dink dit het meestal dalk met plek te doen, want die kamers en badkamers is so klein dat jy sukkel om jou te draai sonder om ernstige beserings op te doen.

Maar dit het my ook laat dink aan die dag toe ek en my man in ’n regte plattelandse hotel, met badkamerdeur en al, tuisgegaan het. Dit was my verjaarsdag en dié oggend is ek die badkamer (met stewige outydse deur) binne om vir die dag te gaan “tittewyt”. My man is al vroeg uit om vir my blomme op die dorpie te gaan soek en ek was alleen in die kamer.

Toe ek nou mooi en klaar is, opgedollie en reg vir my verjaarsdag, wil daardie stewige badkamerdeur nie oop nie. Probeer soos ek wil, die deur sit vas en ek sit vas. Hoog, amper teen die plafon sit die enigste venstertjie in die plek, wat op ’n binneplein uitkyk.

Benoud klouter ek toe tot bo op die toilet se spoelbak, dit nadat die toiletdeksel eers onder my gebreek het en ek met my voet kniediep in die kan beland het. Met my neus by die klein venstertjie uitgedruk trek ek toe die aandag van ’n kelner wat my eers baie verbaas en skepties aangestaar het. Eindelik roep die kelner toe die hotel se faktotum en dié het met die hulp van die binnegoed van sy gereedskaptrommel ná ’n halfuur se gespook die deur wortel-en-tak afgehaal.

Toe ek my vryheid uiteindelik terugkry en vuil en nat by daai deur uitstap, wag ’n hele verwelkomingskomitee van kroegman tot kok en bestuurder in die kamer saam met my man en almal skree: “Happy Birthday!” Die verleentheid was byna ondraaglik.

 

© 2019 Die/The Bronberger