Perde wat gered is van die dood help kinderhuis wesies Print E-mail
News - Ons Mense
Wednesday, 03 December 2008 22:16
Untitled Document

Is dit moontlik vir perde wat eens mishandel en verwaarloos was om kinders te help? Wat daarvan as die kinders, dalk om dieselfde redes as die perde, uit hul ouerhuise weggeneem is en in ’n kinderhuis geplaas is? Dié soort wonderwerk gebeur daagliks op ’n plot in Pienaarspoort. ’n Spesiale vrou met die naam van Annemarie Towsen wou ’n plek skep waar “engele vermom as eens verhongerde perde kan uitreik na die harte en siele van eens verhongerde en gebroke kinders”.


Annemarie Towsen leer kinders ook hoe om perde te versorg

Annemarie en haar viervoetige reddingsgevalle werk met kinders van die Louis Botha tehuis. Sy het haar in 2005 begin toewy aan perdrylesse vir dié tehuis-kinders en kon oor die jare sien hoeveel dit help. “Die perde kon baie meer met dié kinders bereik as wat jare se individuele psigologiese terapie kon,” sê sy.

Selfs die sosiale werkers van die Louis Botha tehuis stem saam. Hulle verslae dui op ’n drastiese positiewe verbetering in die emosionele toestand van die kinders as ’n direkte gevolg van die perdrylesse. Wat haar hartseer maak, sê Annemarie, is dat daar nog soveel meer kinders is wat perde in hulle lewens nodig het. Daarom is sy dringend op soek na borge om dié kinders te help. Sy het sedert 2006 borgskap begin gekry vir twee leerlinge vir weeklikse lesse. Die ‘Equestrian Training Institute’ borg ook nou ’n leerling wat ná skool ’n professionele perdry-instrukteur wil word.

Die feit dat dié kinders werk met perde wat reddingsgevalle was, gee ’n spesiale dimensie aan dié lesse. Die verhaal van die reddingsgevalle is ’n storie van Annemarie se liefde vir perde.


Uitrit by ’n poniekamp in Pienaarspoort

Vossie
Annemarie het haar perdryskool, Enduro, in 2001 begin met een reddingsgeval genaamd Vossie. Sy kon net op Saterdae lesse gee omdat sy nog voltyds gewerk het om geld te kry om meer perde te probeer red. Met elke Kersbonus van haar werkgewer het sy ’n nuwe perd gekoop – meestal reddingsgevalle of perde wat verwaarloos is deur hul vorige eienaars en by perdehandelaars gelaat is waar Annemarie hulle in ’n baie slegte kondisie gekry het. Sy sê dat niemand die perde liefgehad het nie, die meeste was depressief en verhonger en baie het aan ernstige trauma gely omdat hulle mishandel is.

Met baie liefde en aandag, die regte voerprogram en opleiding het dié perde van die heel gelukkigste perde in die ryskool geword. Twee sulke gevalle is die sewe-jaar-oue Babika, ’n albino wat deur ’n vriend van Annemarie by die slagpale gered is. Vandag hou Babika van haar eie ruimte en kla as ander perde te na aan haar loop. Die ses-jaar-oue Stella was ook ’n reddingsgeval. Sy is blind in een oog en het die bokant van een oor verloor. Stella is vandag die trotse ma van vulletjie Flicka.


Annemarie werk met ?engele vermom as eens verhongerde perde?

Bou
So het die getal perde gegroei terwyl Annemarie en haar man elke naweek self die fisiese arbeid op hulle plot gedoen het om die stalle te bou en kampe vir die perde voor te berei. Na ses jaar se harde werk was daar 20 houtstalle, ’n groot arena met afdelings vir spring en ‘dressage’, ’n klubhuis met vermaaklikheidsarea, dubbele lanseerring, paadjies vir ritte in Pienaarspoort se bosse en ’n 3,5 km baan vir die opleiding van uithourit-perde.

Die perdryskool is uiteindelik in 2006 geregistreer met 80 leerlinge en 16 perde. Annemarie het besluit om haar lesse te laat fokus op ’n liefde vir perde. Dit is hoekom sy haar leerlinge ook leer hoe om perde te voer, te versorg en met hulle te kommunikeer. Die perde word so natuurlik as moontlik aangehou en het die vryheid om te wei, in plaas van om onnatuurlik ingeperk te wees.

Hulle gee Annemarie die kans om haar droom te laat waarheid word - om ’n bestaan te maak uit die groot liefde in haar lewe. Sy ry al 26 jaar lank perd en was maar 14 jaar oud toe sy en ’n perd genaamd Hitler ’n uithourit gewen het. Sy ding steeds jaar na jaar mee op haar perd, Jason.

.
Deelnemers aan die brulpaddaskou

Skou
Annemarie kombineer haar passie vir perde met haar kreatiwiteit om sodoende ander lewende wesens ook te help red. Vroeër vanjaar het Pienaarspoort en Donkerhoek ploteienaars saamgespan om ’n bewarea te stig vir die bedreigde brulpaddas wat in die omgewing voorkom.

Enduro ryskool het ’n skou gereël om fondse in te samel vir dié bewarea en 35 ruiters van Enduro het deelgeneem aan die tema-skou. Lesers wat wil help om ’n kind van die Louis Botha tehuis te borg vir perdrylesse by Annemarie, kan haar kontak by 084-581-6233.

 
Besoek die Suid-Afrikaanse Departement van Gesondheid se webwerf vir alle amptelike inligting en opdaterings rakende COVID-19 by www.SAcoronavirus.co.za

© 2020 Die/The Bronberger