Vreethans van Heerden en Metgesel besoek kuierplekke in die Bronberg-gebied ongenooid en betaal self vir dit wat hulle geniet, of dalk nie geniet nie

Dit was aankopiedag vir ons by Farm City se koöperasiewinkel. Met die perdekos, suip-krip, dipstof en allerlei op die bakkie gelaai, laat weet my maag vir my kop hy moet my bene in ’n rigting stuur na ’n plek waar die innerlike versterk kan word en sommer gou ook.

Net ’n klein entjie van die koöperasiewinkel af dra ons bene ons deur die eetvertrek van Koffietijd tot in die tuin. Ja, ek bevind my al weer in ’n teetuin, maar dié keer is die klem openlik op koffie. Koffietijd, op die Hollandse manier. Ons neem stelling in op ’n parkbankie wat voor ’n tafeltjie staangemaak is.’n Groot en mooi sambreelboom, van die papierbas-soort, verskaf welkome koelte teen die hetige son. Vriendelike waarskuwing: As jy self effe breed van bas is, wil jy nie by een van die tafeltjies met die groen, metaalstoeltjies gaan sit nie, tensy jy natuurlik ’n vraat vir pyn is.

Aan die een kant van ons is ’n mak dieretuintjie waar kleingoed se opgewonde stemmetjies elke dan en wan deur die kras geskreeu van’n reuse papegaai uitgedoof word. Aan die ander kant is ’n Plantland se kwekeryplek.

Oral by die ander tafeltjies is groepies kletsende vrouens saamgekoek. Ek tel agtien vrouens, ses stootwaentjies en ’n hele aantal kleuters wat nie lank genoeg stilstaan om behoorlik te kan tel nie. Ek tel net een man, en dit as ek myself bytel. Lekker gesellig by dié Koffietijd.

Koffietijd se tuin het heerlike koelte teen die hetige son

Die ontbytspyskaart bied jou 13 keuses, van ’n Spaanse omelet tot ’n Amerikaanse ‘Hapi Waffle’. Die ‘Ysterman ontbyt’ (met spinasie) en die ‘Breakfast Trifle’ lyk heel ongewoon en vang die oog. Maar dit vir ’n ander keer. Die maag beveel die brein om ’n vleiskossie te bestel. Ek oorweeg ’n hamburger of boerewors en Putu pap. Of dalk die geduldige ou steak en tjips. Uiteindelik val die besluit op die bobotie met geelrys.

Die bobotie was geurig. Nie te skerp nie, maar tog. Na my smaak oordoen hulle die rosyne, van die groot vormlose soort, en skeep hulle die ou porsietjie geelrys af. Die bobotie was ook effe te droog en melerig.

Gelukkig was daar ’n vol bottel miesies Balls byderhand. Ek vermoed die bobotie was dalk net te lank in die warm-oond, daarom ook dat die boonste eiervla-lagie klipsteen hard was. Maar dit het tog die holkol getref en die porsie was ruim genoeg. Dit kos R49.50. Metgesel was baie gelukkig met haar keuse; ’n pannekoek gevul met feta en spinasie. Dit was veral die ‘slim’ plan van Koffietijd se sjef om ’n tamatie-en-uie-sheba daarby te bedien, wat haar grensloos beïndruk het. Metgesel is baie partydig vir ’n tamatie-en-uie-mengsel saam met omtrent enigiets. Die gevulde pannekoek kos R37.

Koffietijd bied ook ’n goeie verskeidenheid ligte etes, soos tramazzinis en quiches aan en ek is nie verbaas om te sien dat daar ook ’n ‘kiddies menu’ is nie.

En oor dit ’n koffietuin is, kan jy natuurlik uit ’n aantal koeke en terte kies – van die spyskaart af, nou. Die plek het ook ’n ‘volle’ dranklisensie.