’n Inspekteur wat sedert die ontstaan van die Boschkopse polisiestasie 15 jaar gelede daar gewerk het, is op Vrydagaand 26 September dood in ’n trompop botsing teen ’n groot polisie-pantservoertuig. Insp. Moses Joseph Matlala se motor het omstreeks 8:15 nm op die Boschkop-pad reg van voor teen die pantservoertuig gebots. Drie polisiereserviste is lig beseer in die botsing.

Volgens sers. Marinda Stoltz, polisiewoordvoerder, was insp. Matlala ná werk van die polisiekantoor onderweg na sy huis toe die ongeluk gebeur het. Insp. Wynand van der Merwe, wat in 1993 saam met insp. Matlala by Boschkop begin het, sê hy was gewild onder sy kollegas. Almal het hom op sy bynaam, Baby Jake, genoem.

“Baby Jake was ’n hardwerkende polisieman en hy was altyd vriendelik. Ons gaan hom mis,” sê insp. Van der Merwe. Insp. Matlala was in sy laaste diensjare by die speurtak betrokke. Hy laat ’n vrou, twee dogters en kleinkinders agter.

Insp. Moses Joseph ?Baby Jake? Matlala