Hier kom ’n ding. Skuif solank reg want Die Bronberger word ses jaar oud met ons
September-uitgawe.
Om dié mylpaal te vier, beplan ons ’n baie spesiale verjaarsdag-uitgawe en ons nooi
alle adverteerders en lesers om deel daarvan te wees. In die jare wat dié een voorafgegaan
het, is ons verjaarsdag-uitgawes in September telkens goed ontvang en baie goed
ondersteun.
Ons kan klaar sien dat hierdie geen uitsondering gaan wees nie. Inteendeel . . . ons het
die afgelope jaar die grootste groei sedert ons ontstaan beleef en verwag om ’n reuse
versamelaarsitem as verjaarsdag-uitgawe op die rakke te sit.
Dit is die jaar waarin ons met tema-artikels begin het wat hiper- gewild geword het. Ons
praat nou van 'Dinge om te doen in die Bronberg' in ons Februarie-uitgawe, 'Jou huis in
die Bronberg' in ons Maart-uitgawe, 'Kom kuier in ons kontrei' in April en 'Bly só vuurwarm
in die Bronberg' in Junie. Lesers gebruik dié artikels as verwysingsgidse en hul
gewildheid kan gemeet word aan die hoeveelheid 'hits' wat hulle op ons nuwe webwerf
kry.
Maar dit is die vyf vorige verjaardaguitgawes wat telkens die heel gewildste onder
lesers en adverteerders was. En alles dui daarop dat vanjaar se September-tydskrif die
spreekwoordelike koek gaan vat. ’n Uitgawe wat hoogtepunte uitlig, voorspellings oor
die volgende jaar waag en lesers en adverteerders intrek as die kern waarom hulle eie
gemeenskapspublikasie wentel.
Ons is trots daarop dat Die Bronberger, as onafhanklike publikasie, nou sy sesde
bestaansjaar betree. Ons is trots en ons is dankbaar vir die volgehoue ondersteuning
van die gemeenskap wat ons dien, die eiesoortige mense van die Bronberg-gebied.
Om ’n glanstydskrif binne ’n geslote gemeenskap, sonder die rugsteuning van enige
groot korporatiewe- of ander organisasie uit te gee en oor ’n tydperk van ses jaar
stewig te bly staan en selfs te groei, wil gedoen wees.
Ons wil almal wat in die laaste ses jaar gereeld of net soms in Die Bronberger geadverteer
het, nooi om ons verjaarsdag saam met ons te vier deur ’n advertensie in
September se bielie-uitgawe te plaas.
En as jy nog nooit in Die Bronberger geadverteer het nie, is hierdie die ideale geleentheid
om nuwe voete nader te lok. Jou advertensie gaan in ’n versamelstuk verskyn wat
ons lesers soos ’n kosbare besitting bewaar en in terug blaai oor baie maande heen.
Ons leser-vriende kan vir ons ’n brief skryf oor dié dinge wat vir hulle in die afgelope
publikasiejaar uitgestaan het. As iets met jou gebeur het, jou gepla het, of as iets jou
bly, kwaad, skaam, hartseer, knorrig, dankbaar of wat ookal gemaak het, sit pen op
papier of vingers op klawerbord en deel dit met jou mede-Bronbergers.
Hier kom ’n ding. |