Cullinan se historiese‘Rec Club’ gaan omring word deur ’n nuwe veiligheidskompleks en hotel-ontwikkeling wat bekend sal staan as Cullinan Village. Volgens die ontwikkelaar, Rui Ferreira van TMM Developments in Pretoria, word fase een en twee direk langs die historiese ontspanningsklub in Mainstraat ontwikkel. Inwoners van Cullinan is besorg daaroor dat die karakter van die klub, wat in 1905 gebou is, geskend sal word.

Vooraansig van Cullinan se ‘Rec Club’.

Onderhandelings tussen die belangegroepe is nog aan die gang. Inwoners wil ook weet hoekom die swembad en tennisbane nie vir die gemeenskap behou is nie. Die ‘Rec Club’ soos mense graag na die geskiedkundige klipgebou verwys, lê Cullinan se mense na aan die hart.

Dit is in 1905 vir die Premiermyn as ontspanningsklub gebou. Oor die jare het die klub gedien as die bymekaarkomplek van die gemeenskap. Die eerste ‘silent movies’ is hier gewys. Dit is ook gebruik as biblioteek, danssaal en konserte vir die soldate. In die Tweede Wêreldoorlog is die saal oorgegee aan die YMCA sodat dit as ontspanningsentrum vir troepe gebruik kan word.

Die ‘Rec Club’ huisves ook die bekende muurpanele wat deur onbekende, Italiaanse oorlogsgevangenes geskilder is.

Een van agt muurpanele in die ‘Rec Club’ se saal. Dit wil voorkom of die tonele van foto’s en poskaarte gekopieer is, want afbeeldings van die werke van WH Coetzer en Erich Mayer is hier te sien. As iemand bevestiging hiervoor het, laat weet asseblief.

Fase een van die ontwikkeling is noord van die bestaande gebou en grens aan die treinspoor. Fase twee is wes van die bestaande gebou waar die swembad en tennisbane was.

Die ontwikkeling bestaan uit 32 luukse eenhede van ongeveer 200 vierkante meter elk met die ingang in Librarylaan parallel aan die bestaande hoofingang van die klub.

Werksaamhede gesien van laer Librarylaan met die tennishuisie regs en die ‘Rec Club’ se wesaansig.

Rui Ferreira is bewus van die historiese waarde van die perseel en sê hy het reeds ruimte ingeboet om ’n aparte ingang tot die veiligheidskompleks tot stand te bring sodat die vooraansig van die ou ‘Rec Club’ nie verlore gaan nie. Om regte vir die ontwikkeling te verkry is ongeveer R2 miljoen gespandeer om elektriese dienste te opgradeer. Die hotel, met 32 kamers, is fase drie.